अस्ट्रेलियाका दुई सहरमा ‘पीआर’ को रेड कार्पेट प्रिमियर, विश्वव्यापी रिलिजको तयारी
काठमाडाैं । शोभित बस्नेतको निर्देशनमा निर्माण भएको चलचित्र ‘पीआर’ को अष्ट्रेलियाका दुई सहरमा रेड कार्पेट प्रिमियर गरिने भएको छ । सलोन सलिना फिल्म्सको ब्यानरमा निर्माण भएको यो सिनेमाको आगामी अगस्ट ९ र १२ मा अष्ट्रेलियाका दुई सहरमा हुने भएको हो ।
यो चलचित्रको अष्ट्रेलियामा आरएफएम फ्यासिलिटी म्यानेजमेन्टका रञ्जित शाह र करियर गेटवे अष्ट्रेलियाका सन्तोष तिवारीको प्रस्तुतीमा प्रदर्शन हुँदैछ ।
निर्माण पक्षका अनुसार चलचित्र ‘पीआर’ को पहिलो प्रिमियर अगस्ट ९ मा सिड्नीको हर्सफिलस्थित इभेन्ट सिनेमाका दुई हलमा हुनेछ भने दोस्रो प्रिमियर अगस्ट १२ मा न्यू क्यासलको रिडिङ सिनेमाका दुई हलमा आयोजना गरिने भएको छ ।
यस चलचित्रमा आर.ए. सुरज पौडेल, राजन कुँवर, विनिता कार्की, पूजा चौधरी, बिमला खत्री, आस्मा अधिकारी, गणेश बुढाथोकी, कृष्ण थापा, म्याक्स, मस्तानी र नवीन घायलको अभिनय रहेको छ । विशेष भूमिकामा नीर शाह, गौरी मल्ल, रविन्द्र खड्का, दिक्पाल कार्की र उत्तम केसीले अभिनय गरेका छन् ।
ए वान ग्रुप सर्भिसका प्रदीप दाहाल र इन्द्रेणी ग्रुपका लक्ष्मण सापकोटा यस चलचित्रका निर्माता हुन् । निर्देशक बस्नेतकै कथा रहेको चलचित्रको पटकथा र संवाद गणेश बुढाथोकीले तयार पारेका हुन् ।
चलचित्रको छायांकन सौरभ सायमी (अष्ट्रेलिया) र सौरभ लामा (नेपाल)ले गरेका हुन । सिनेमामा बन्दे प्रसादको सम्पादन रामजी लामिछानेको नृत्य निर्देशन, मानस राज र भीम बीसीको संगीत रहेको छ ।
निर्माण व्यवस्थापन केवलमान सिंह बस्नेतले सम्हालेका छन् भने प्रमुख सहायक निर्देशकमा रामजी राउत, गणेश बुढाथोकी र मणि तामाङ रहेका छन् ।
यो सिनेमाको ६० प्रतिशत छायांकन अष्ट्रेलियाको विभिन्न सहरमा र ४० प्रतिशत नेपालमा गरिएको हो ।
विदेशमा रहेका नेपाली विद्यार्थीहरूको संघर्ष, र नेपालमा रहेका परिवारजनको पीडा फिल्मको मुख्य विषयवस्तु हो।
निर्माण टिमका अनुसार ‘पीआर’ नेपाली डायस्पोराले हेर्नैपर्ने चलचित्र हो । विदेश गएका छोराछोरीले र नेपालमा रहेका बुवाआमाले एक अर्कामा गर्ने आर्थिक तथा विभिन्न कुरालाई सिनेमाको कथामा समेटिएको छ ।
चलचित्रको कथाका बारेमा सुनाउदै निर्देशक बस्नेतले भने, “अहिले ‘पीआर’ प्रति अष्ट्रेलियाका विभिन्न सहरहरूमा उच्च माग देखिएको छ । चाँडै नै यो सिनेमालाई विश्वव्यापी रूपमा रिलिज गर्ने तयारीमा छौं।”
चलचित्र ‘पीआर’ को रिलिजका लागि वितरकसँग छलफल भइरहेको उनले बताए ।