थिम पोस्टर सार्वजनिक गर्दै ‘रेलको बाटो’ निर्माणको घोषणा
काठमाडौं । लक्ष्मण सुनारको निर्देशनमा चलचित्र ‘रेलको बाटो’ बन्ने भएको छ । कर्णाली क्षेत्रको सामाजिक, राजनीतिक र भौतिक अवस्थालाई पर्दामा उतार्ने उद्देश्यसहित थिम पोस्टर सार्वजनिक गर्दै घोषणा गरिएको हो ।
कस्तुरी प्रोडक्सन प्रालिको निर्माणमा र रेड अम्ब्रेला इन्टरटेन्मेन्ट प्रालिको सहकार्यमा निर्माण हुने यो चलचित्रको कथा निर्देशक सुनार स्वयमंको रहेको छ ।
निर्माण टिमले सार्वजनिक गरेको थिम पोस्टरमा “गाउँपालिका भवन उद्घाटन” लेखिएको गेट र मुनि “प्रधानमन्त्रीको ज्युलाई स्वागत छ” भन्ने ठूलो ब्यानर देखिन्छ । उक्त दृश्यले कर्णाली राज्यको लागि ‘दर्शनीय प्रयोगशाला’ मात्र बनेको हो कि भन्ने आलोचनात्मक सन्देश दिने संकेत गर्छ ।
साथै, पोस्टरमा देखिएको “लैजा तेरो सिंहदरबार, मलाई मेरो गाउँ फिर्ता दे” भन्ने वाक्यले राज्यको उपेक्षामाथि गहिरो भावनात्मक र राजनीतिक संकेत गरेको छ । यो थिम पोस्टर राकेश दाहालले डिजाइन गरेका हुन् ।
निर्देशक सुनारका अनुसार यस चलचित्रले सामान्य नागरिकको संघर्ष, श्रीमान्–श्रीमतीबीचको सम्बन्ध र राजनीतिक बेवास्तालाई कथानकको मूल विषय बनाउनेछ । कर्णालीका सडक अभाव, उपचारको कठिनाइ, विकास योजनामा देखिने हस्तक्षेप र शक्ति केन्द्रको नजरन्दाजजस्ता विषयहरू ‘रेलको बाटो’को मुख्य कथा हुने उनले बताएका छन् ।
यसअघि सार्वजनिक भएको ‘रेलको बाटो’ शीर्षकको म्युजिक भिडियोले उल्लेखनीय चर्चा पाएको थियो । निर्माण टिमका अनुसार अब सोही नाममा बन्ने चलचित्रले “दुरदराजको पीडा र कहिल्यै नआउने रेलजस्तो आशा”लाई पर्दामा जीवित ढंगले प्रस्तुत गर्ने प्रयास हुनेछ ।
यो चलचित्रको हाल पटकथा अन्तिम चरणमा रहेको र कलाकारको टुंगो चाँडै लाग्ने निर्माणपक्षले जानकारी दिएको छ ।
नगेन्द्र घिमिरे कार्यकारी निर्माता रहेको चलचित्र ‘रेलको बाटो’मा सुरज पण्डितको संगीत, निसाल पौडेलको छायांकन रहने छ ।
यो वर्षको अन्त्यतिर कर्णालीका विभिन्न जिल्लामा छायांकन गरिने चलचित्र ‘रेलको बाटो’लाई २०८३ सालमा प्रदर्शनमा ल्याइने योजना निर्माणपक्षको रहेको छ । यस चलचित्रको वितरण अधिकार काफिया फिल्म्सले लिएको छ ।