‘रत्यौली’ घोषणा गर्दै ६ वर्षपछि फर्किए मुस्कान ढकाल
काठमाडाैं । ‘नाई नभन्नु ३’ र ‘समभर लभ’ जस्ता सफल चलचित्र निर्देशन गरेका निर्देशक मुस्कान ढकालको निर्देशनमा नयाँ नेपाली सिनेमा ‘रत्यौली’को निर्माण हुने भएको छ ।
नेपाली मौलिकता, परम्परा र संस्कृतिमा आधारित रहेर निर्माण हुने सिनेमाको शुक्रबार औपचारिक घोषणा गरिएको हो ।
विवाह संस्कारको विशेष अङ्गका रूपमा महिलाहरुले मात्र गाउने परम्परागत लोकगीत ‘रत्यौली’बाट प्रेरित भई यो सिनेमाको नाम राखिएको निर्माणपक्षले जानकारी गराएको छ ।
‘रत्यौली’लाई रन्जन रिजालले प्रस्तुत गर्दैछन् । उनी यो सिनेमामार्फत निर्माता रूपमा डेब्यु गर्न लागेका हुन् ।
२०६२/६३ सालदेखि म्युजिक भिडियो क्षेत्रमा मोडलका रूपमा सक्रिय रहेका रिजालले सयौं भिडियोमा अभिनय गर्दै सशक्त छवि बनाएका छन् ।
नेपाली युवा निर्देशकहरूमा सम्भावना बोकेका ढकालले यो चलचित्रलाई सांस्कृतिक र पारिवारिक कथामा आधारित रहेर निर्देशन गर्न लागेका हुन् ।
चलचित्र ‘समभर लभ’ रिलिजको ६ वर्षपछि ढकाल निर्देशनमा फर्किएका हुन् । यस अघि उनले ‘पञ्चामृत’ निर्देशनको तयारी गरेका थिए । तर, यो सिनेमा तयार हुन सकेन ।
नाइट एंगल इन्टरटेनमेन्टको ब्यानरमा निर्माण हुन लागेको सिनेमालाई नोयन्द्र धिताल, विजय कुमार पाठक र मुस्कान ढकालको लगानीमा निर्माण गर्न लागिएको हो ।
आगामी तिहार लगत्तै छायांकन सुरु हुने सिनेमाको निर्माण टिमले टाइटल सार्वजनिक गरेको हो । अहिले कलाकार छनोट र प्राविधिक तयारी अघि बढिरहेको निर्माण टिमले जनाएको छ ।