जितुको ठाउँमा सौगातकाे इन्ट्री
काठमाडौं । स्व.गुरुप्रसाद मैनालीको चर्चित कथासंग्रह ‘नासो’मा सङ्ग्रहित ‘परालको आगो’ कथामा आधारित भएर निर्माण हुन लागेको चलचित्र ‘परालको आगो’मा अभिनेता सौगात मल्ल अनुबन्धित भएका छन् ।
अभिनेता मल्ल चलचित्रको मुख्य पात्र मध्ये एक ‘जुठे दमाई’ को भूमिकामा देखिनेछन् । निर्माण टिम उनलाई बिहीबार औपचारिक रूपमा अनुबन्ध गराएको हो ।
यसअघि यो भूमिकामा अभिनेता जितु नेपाल अनुबन्ध भएका थिए । तर, उनले नभ्याउने भएपछि चलचित्रमा सौगातलाई भित्र्याएको हो ।
निर्माता सुशील पोखरेलको लगानीमा बन्ने यस चलचित्रमा सौगात अनुबन्ध भएसँगै मुख्य कलाकारहरूको लाइनअप पूरा भएको निर्माणपक्षले बताएको छ ।
‘परालको आगो’मा प्रकाश सपुत, सुहाना थापा, सिर्जना अधिकारी, शंकर आचार्य, किशोर भण्डारी, कुलदिप अधिकारी, सरु भण्डारी, रेणु न्यौपाने र ज्याक श्रेष्ठ अनुबन्ध भइसकेका छन् ।
‘परालको आगो’ श्रीमान्-श्रीमती चामे र गौँथलीको कथा हो । यसमा दुई पात्रको झैँझगडालाई परालको आगोको संज्ञा दिइएको छ । परालको आगोझैँ श्रीमान्-श्रीमतीको झगडा पनि क्षणिक र अस्थायी हुन्छ भन्ने कथाको मूल भाव हो ।
चलचित्रको गीत लेखनमा सुरेन्द्र राना, मनबहादुर मुखिया र प्रकाश सपुत रहनेछन् भने संगीत वरिष्ठ संगीतकार शान्ति ठटाल, सत्य स्वरूप र प्रकाश सपुत रहनेछन् ।
फिल्मको निर्देशन लक्ष्मण सुनारले गर्ने छन् भने छायांकन आगामी भदाै २६ गतेदेखि म्याग्दी आसपासबाट सुरु गरिने निर्माण पक्षले जनाएको छ।
निर्माता पोखरेलका अनुसार यो चलचित्र सामाजिक सन्देश दिने उद्देश्यसहित तयारीमा रहेको छ र हाल टिम पूर्ण उत्साहका साथ काममा जुटेको छ । निर्माता पोखरेलले यसअघि ‘मैदान’, ‘जीवनदाता’, ‘निगरानी’, ‘जय शिव शंकर’, ‘लभ सभ’, ‘राधे’ र ‘यात्रा’ चलचित्र निर्माण गरिसकेका छन् ।
यस चलचित्रमा रामजी लामिछाने नृत्य निर्देशक, सुशील देवकोटाको लेखन र सुलक्षण भारतीको स्क्रिप्ट डक्टरिंग, संकल्प भुजेलको छायांकन र नगेन्द्र घिमिरे प्रोडक्सन म्यानेजर रहेका छन् ।
यो चलचित्रको कथा मैनाली कथा पुरस्कार ट्रस्टको अनुमति लिएर निर्माण गर्न लागिएको हो । मैनालीको ‘नासो’ कथा संग्रहमा समावेश कथा ‘परालको आगो’ यसअघि ४५ वर्षअघि निर्देशक प्रताप सुब्बाले पनि निर्माण गरेका थिए ।