प्रकाश सपूत र स्वस्तिमा खड्काको बोलचाल बन्द !
काठमाडौं । गायक तथा अभिनेता प्रकाश सपूत र अभिनेत्री स्वस्तिमा खड्काबीच बोलचाल बन्द भएको छ । चलचित्र ‘वसन्त’ रिलिज भएपछि उनीहरूबीच बोलचाल बन्द भएको हो ।
चलचित्र रिलिज भएपछि हल भिजिटलगायत मार्केटिङमा नहिँडेको भन्दै प्रकाशले असन्तुष्टि जनाएसँगै उनीहरूबीच बोलचाल बन्द भएको स्रोतले बताएको छ ।
रिलिजसम्म स्वस्तिमाले दिलोज्यान दिएर ‘वसन्त’को पब्लिसिटीमा हिँडेकी थिइन् । आफ्नै लगानीमा बनेको चलचित्रमा भन्दा धेरै ‘वसन्त’को पब्लिसिटीमा हिँडेकी थिइन् ।
‘वसन्त’ रिलिजपछि पनि स्वस्तिमाले सामाजिक सञ्जालमार्फत सिनेमाका कन्टेन सेयर गरिरहेकी थिइन् । तर, प्रकाशले हलमा दर्शक भेट्न नहिँडेको भन्दै असन्तुष्टि जनाएपछि उनीहरूको व्यवसायिक सम्बन्ध चिसिएको बुझिएको छ ।
केही दिन अगाडि चलचित्र ‘हरिबहादुरको जुत्ता’को पोस्टरका लागि भएको सुटिङमा उनीहरूको भेट भए पनि नबोली तस्बिर सुट गरेको स्रोतको भनाइ छ ।
स्रोत भन्छ, “चलचित्रको पोस्टर सुटमा प्रकाश र स्वस्तिमाबीच भेट भएको थियो । तर, उनीहरूले आपसमा कुनै संवाद साटासाट नगरी मौनमै फोटोशूट सकेका थिए । उनीहरूबीच आँखाले हेर्नेबाहेक कुनै संवाद भएन । यो दृश्यले पनि उनीहरूबीच बोलचाल नभएको स्पष्ट पारेको थियो ।”
चलचित्र ‘वसन्त’को राम्रो हाइप भए पनि व्यवसायिक रूपमा भने असफल भएको थियो । बक्स अफिसमा चलचित्रले लगानी उठाउन पनि संघर्ष गर्यो । समीक्षा पनि राम्रो पाएको थिएन ।
‘वसन्त’को लेखन र निर्देशन पनि प्रकाश आफैँले गरेका थिए । हिरो पनि आफैँ थिए । स्वस्तिमा उक्त सिनेमाको हिरोइन थिइन् ।
प्रकाश र स्वस्तिमाको सहकार्य भने यो पहिलो थिएन । स्वस्तिमाले यसअघि प्रकाश सपूतका गीतको भिडियोमा पनि अभिनय गरेकी थिइन् । यिनै सहकार्यहरूको पृष्ठभूमिमा चलचित्र ‘वसन्त’मा उनीहरूको सहकार्य भएको हो ।
हाल दुवै कलाकार मौन छन् । न प्रकाशले यो विषयमा खुला प्रतिक्रिया दिएका छन्, न स्वस्तिमाले । सार्वजनिक रूपमा उनीहरू कुनै पनि आरोप–प्रत्यारोपमा आएका छैनन् । अब आउँदो दशैंको फूलपातीका दिन अर्थात असोज १३ गतेदेखि देशभरका हलमा प्रदर्शनमा आउने तयारीमा रहेको ‘हरिबहादुरको जुत्ता’को प्रचार प्रसारमा सहकार्य गर्छन् या दूरी अझ बढाउँछन्, त्यो भने हेर्न बाँकी छ ।