‘सैयारा’को लागि पहिलो रोजाइ थिए यी चर्चित जोडी, अहान-अनीतलाई कसरी मिल्यो ?
काठमाडौं । अहान पाण्डे र अनिता पड्डा अभिनित चलचित्र ‘सैयारा’ले बक्स अफिसमा ऐतिहासिक सफलता हात पारेको छ । यो सिनेमा ३०० करोड पार गर्ने पहिलो यस्तो चलचित्र बनेको छ, जसमा मुख्य कलाकारहरूका रूपमा दुई नयाँ अनुहारले डेब्यू गरेका थिए ।
‘सैयारा’ यी दुई नयाँ कलाकार अहान र अनिताको करिअरका लागि टर्निङ प्वाइन्ट बन्यो । अहिले यो चलचित्रले बक्स अफिस मात्र होइन, दर्शकको मन पनि जित्न सफल भएको छ । तर, धेरैलाई थाहा नहुन सक्छ ‘सैयारा’का लागि सुरुमा अहान र अनीता होइन बलिउडका चर्चित जोडी सिद्धार्थ मल्होत्रा र कियारा आडवाणीका लागि सोचिएको सिनेमा थियो ।
मिडिया रिपोर्टअनुसार निर्देशक मोहित सुरीले ‘सैयारा’को कास्टिङका क्रममा सुरुमा सिद्धार्थ र कियारालाई प्रमुख भूमिकामा लिने योजना बनाएका थिए । दुबै ‘शेरशाह’ पछि अत्यधिक चर्चामा रहेका कलाकार थिए, जसले रोमान्टिक जोडीको रूपमा राम्रो प्रभाव छोडेका थिए । तर, विभिन्न कारणले गर्दा यो जोडी ‘सैयारा’मा देखिन पाएन ।
भारतीय मिडियाका अनुसार सिद्धार्थको ‘लुक टेस्ट’ निर्देशक मोहित सुरीको अपेक्षाअनुसार भएन । अर्कोतर्फ कास्टिङको समय र स्क्रिप्टबारे केही मतभेद समेत उत्पन्न भएका थिए । अन्ततः निर्देशक मोहित सुरीले नयाँ अनुहारहरू खोज्ने निर्णय गरे र सोही क्रममा आफूले खोजेको ‘फ्रेसनेस’ यिनै दुई अहान र अनितामा भेटेका थिए ।
चलचित्र ‘सैयारा’ले प्रदर्शनको पहिलो दुई सातामै बक्स अफिसमा धमाकेदार कमाई गर्दै ३०० करोड क्लबमा प्रवेश गर्यो । यसबीचमा अर्को नयाँ चलचित्र ‘महावतार नरसिंह’ रिलिज भए पनि ‘सैयारा’को व्यापारमा खासै असर परेन । रिलिज भएको १७ दिनमै ३०० करोडको आँकडा पार गरिसकेको यो सिनेमालेले हालसम्म ३०८.२५ करोड रुपैयाँ कमाइसकेको छ ।
हालै रिलिज पछिको सबैभन्दा न्यून कमाई भएको दिन पनि ‘सैयारा’ले झण्डै २.७५ करोड कमाएको छ, जुन नयाँ कलाकारका लागि ऐतिहासिक सफलता मानिन्छ ।