चलचित्र विकास कम्पनीको गायब भएको २० रोपनी जग्गा खोज
निकै लामो समयदेखि बन्द रहेको नेपाल चलचित्र विकास कम्पनी पुनः सञ्चालन हुने खबर आएको छ । कम्पनी पुनः सञ्चालनका लागि यही साउन २६ मा विशेष साधारणसभा बोलाइएको छ ।
केही वर्षदेखि नियमित लेखापरीक्षण तथा वार्षिक साधारणसभा समेत नभएको कम्पनी पुनm सञ्चालन गर्न सजिलो पक्कै छैन । साविकमा भएका सञ्चालकहरूको समयावधी सकिसकेकाले कम्पनी ऐन, २०६३ को दफा २ बमोजिम विशेष साधारणसभा बोलाउनु पर्नेछ । यसका लागि ५० प्रतिशत भन्दा बढी सेयरधनीहरूले कम्पनी रजिष्ट्रारको कार्यालयमा निवेदन दिइसकेका छन् ।
कम्पनी रजिष्ट्रारको कार्यालयले कम्पनी ऐन, २०६३ को दफा ८२ को उपदफा ४ बमोजिम २५ दिनभित्र विशेष साधारणसभा बोलाउन निर्देशन दिएपछि विशेष साधारणसभा बोलाइएको हो ।
प्रक्रियाअनुसार साधारणसभाले सञ्चालक समिति गठन गर्नेछ । कम्पनीको उद्देश्य बमोजिमको व्यवसायिक योजना बनाई कार्यान्वयनका लागि आवश्यकताअनुसार निर्णय गरी सञ्चालक समितिलाई अख्तियारी प्रदान गर्नेछ ।
गोपीकृष्ण मुभिजले कम्पनीको ५१ प्रतिशत सेयर खरिद गरेको थियो । कम्पनीको निर्देशक उद्धव पौडेल छन् ।
२०४८ सालमा निजीकरण गरी सरकारले चलचित्र विकासलाई भाडा (लिज)मा दिएको थियो । पहिला सरकारले २७ रोपनी जग्गा दिए पनि अहिले ६.७५ रोपनी क्षेत्रफलमा कम्पनी खुम्चिएको छ । हाल कम्पनीको २० रोपनी गायब छ । उक्त जग्गा व्यक्तिको नाममा दर्ता भएपछि कम्पनी अहिले विवादमा छ ।
२०२८ सालमा शाही नेपाल चलचित्र संस्थानको रूपमा स्थापना भएको थियो । बालाजुमा रहेको कम्पनीलाई २०४९ सालमा निजीकरणपछि नेपाल चलचित्र विकास कम्पनीबाट कारोबार सुरु गरेको थियो ।
२०५० कात्तिकमा ५१ प्रतिशत बिक्री गरिएको थियो । बाँकी ४९ प्रतिशत पनि चलचित्रसँग सम्बन्धित व्यक्ति, सर्वसाधारण र कर्मचारीलाई दिइएको थियो ।
नेपाल स्टक एक्सचेन्ज (नेप्से)मा समेत सूचीकृत नेपाल चलचित्र विकासको लामो समयदेखि दोस्रो बजारमा सेयर कारोबार भएको छैन ।
नेपाल चलचित्र विकास कम्पनीको जग्गा सरकारी हो । जग्गा सरकारको भए पनि यो चलचित्रकर्मीको सम्पत्ति हो । तर यो कसरी व्यक्तिका नाममा पुग्यो, किन पुग्यो, के कारण पुग्यो, केका लागि पुग्यो र कासको मिलिभगतमा पुग्यो यो कुरा महत्वपूर्ण छ । त्यसैले यसको तत्काल छानबिन हुन जरुरी छ । र, दोषीलाई कारबाही गर्दै गुमेको वा निजीकरण गरिएको वा व्यक्तिका नाममा सारिएको जग्गा फिर्ता हुनुपर्छ ।
यो जिम्मा सरकारको मात्रै होइन, आफू रहेको क्षेत्रमा कहाँ के भइरहेको छ भनेर चासो देखाउनु स्वयं चलचित्रकर्मीको पनि दायित्व हो । त्यसैले यसमा सरोकारवाला सबैको चासो रहोस् । गुमेको कम्पनीको जग्गा तत्काल फिर्ता होस् । दोषीलाई कठघरामा उभ्याउन सरकार लागोस् ।