शान्तिश्रीको ‘साथी खुरापाती’ गीतको विजोग (भिडियो)
काठमाडौं । चर्चित गायिका शान्तिश्री परियारले यस वर्षको तीजका लागि ल्याएको नयाँ गीत ‘साथी खुरापाती’ अपेक्षाकृत कमजोर प्रदर्शन गरिरहेको छ ।
आफ्नै प्रस्तुतिमा र आफ्नै युट्युब च्यानलमार्फत केही दिनअघि सार्वजनिक गरिएको यस गीतले दर्शक–स्रोताको ध्यान आकर्षित गर्न नसकेको देखिन्छ ।
गीतको शीर्षकले सुरुमा सामाजिक सञ्जालमा केही चर्चा पाएको थियो । कतिपयले यसलाई कसैलाई लक्षित गरेर बनाइएको हो कि भन्ने अनुमानसमेत गरेका थिए । पछिल्लो समय शान्तिश्री र एक चर्चित लोकदोहोरी गायकबीच सम्बन्धमा तिक्तता आएको चर्चा रहेकाले यस्तो अड्कलबाजीलाई थप बल मिलेको हो ।
तर, गीत सार्वजनिक भएको केही दिन बितिसक्दा पनि युट्युबमा यसको दर्शक संख्या १ लाखसम्म नपुग्नु शान्तिश्रीका लागि निराशाजनक बनेको छ । तुलना गर्दा, उनले दुई वर्षअघि तीजमा ल्याएको ‘अरेली काँडैले’ गीतले हालसम्म १० करोडभन्दा बढी भ्युज पाइसकेको छ भने गत वर्षको ‘लौन नी भैया’ गीतले पनि छोटो समयमा १ करोड भ्युज नाघिसकेको थियो ।
यो समाचार तयार पर्दासम्म ‘साथी खुरापाती’ गीतले सार्वजनिक भएको पाँच दिनमा १ लाख १ हजार ४ सय ३१ भ्युज पाएको छ । शान्तिश्री परियारका यस अघिका गीतको तुलनात्मक रूपमा यो नयाँ गीतको भ्युज नआउनुले विजोग देखिएको छ ।
यस ‘साथी खुरापाती’ गीतले न त भ्युजमा, न त चर्चामा पुराना गीतको जस्तो प्रभाव छोड्न सकेको छ ।
स्रोतहरूका अनुसार गायिका परियारको यसवर्ष सार्वजनिक गीतको लय, शब्द तथा प्रस्तुति दर्शकलाई गाउन र सम्झन सहज नपरेको सम्भावना छ, जसका कारण यस गीतले अपेक्षित सफलता पाउन सकेन ।