‘कोशेढुङ्गा’को गीत टिकटकमा हिट हुँदाको संकेत के हो ? गीत चल्दा सिनेमा पनि चलेका छन्
काठमाडौं । चलचित्र ‘कोशेढुंगा’को गीत ‘नत्र भने जिन्दगी व्यर्थ छ’ले टिकटकमा अनपेक्षित रूपमा सफलता पाइरहेको छ । टिकटकमा अनपेक्षित रूपमा यो गीतमा भिडियो बनेका छन् । लाइक, कमेन्ट र सेयर भएको पाइएको छ ।
‘नत्र भने जिन्दगी व्यर्थ छ’मा एक लाख ४० हजारभन्दा धेरै भिडियो बनिसकेका छन् । “यो गीत टिकटकमा ११७ मिलियनपटक हेरिएको छ । टिकटकमा १३ मिलियन लाइक्स, दुई मिलियन कमेन्ट र चार लाख टिकटकबाट सेयर भएको छ,” कोशेढुंगाका निर्देशक सरोज पौडेलले भने ।
युट्युबमा ४१ लाखभन्दा धेरैले हेरिसकेका छन् । गीत लोकप्रिय हुन्छ भन्नेमा आफ्नो टिम पहिलै ढुक्क रहेको निर्देशक सरोज पौडेल बताउँछन् । “गीत हिट हुन्छ भन्नेमा हामी ढुक्क थियौँ,” उनले भने, “किनकी यो डान्सिङ नम्बर छ । टिपिकल पनि भएकाले गीत हिट हुन्छ भन्नेमा हामीलाई कुनै सन्देह थिएन ।”
अहिले चलचित्र हिट हुनलाई त्यो भन्दा पहिला नै गीत हिट हुनुपर्छ भनिन्छ । त्यसैले चलचित्रको प्रचारको सबैभन्दा बलियो टुल्स नै गीतलाई मानिन्छ । गीत जति धेरै हिट भयो त्यति नै चलचित्र पनि हिट हुन्छ भन्ने मान्यता राखिन्छ ।
पछिल्लो केही समययताको ट्रेन्ड हर्ने हो भने पनि त्यस्तै देखिन्छ । ‘बुझाइदेउ कसैले’ हिट भयो । ‘बोक्सीको घर’ पनि हिट भयो । ‘रुकुम मैकोट’ हिट भयो ‘खुस्मा’ हिट भयो । ‘रैयाँ चाँदीको’ र ‘काँधेकुरी’लगायत गीत हिट भए । ‘पूर्ण बहादुरको सारङ्गी’ पनि हिट भयो । यस्ता थुप्रै उदाहरण छन् ।
त्यसैले ‘नत्र भने जिन्दगी व्यर्थ छ’ हिट हुँदा चलचित्र कोशेढुंङ्गा’ पनि हिट हुनेमा निर्माणपक्ष ढुक्क छ । “हामीले ल्याएको गीत दर्शकले मन पराइदिनुभयो । चलचित्र पनि हामीले दर्शकले मन पराउने खालको बनाएका छौँ,” निर्देशक पौडेलले भने, “भरपुर महेनत गरेर दर्शकको मन जित्ने सिनेमा बनाएका छौँ । त्यसैले दर्शकले सिनेमा मन पराउनेमा हामी विश्वस्त छौँ ।”
‘नत्र भने जिन्दगी व्यर्थ छ’ डान्सिङ नम्बर छ । गीतमा नेत्र अर्यालको शब्द छ भने हुकलाइन खेम सेन्चुरीको छ । संगीत खेम सेन्चुरीले नै गरेका छन् । गीतमा स्वर खेम सेन्चुरीसँगै समीक्षा अधिकारी र दिपिका बयम्बु मगरको छ ।
गीत तीजको सेटअपमा छ । सिनेमाभित्र रहेको यो गीतले विवाहित र अविवाहितबीचको अन्तरबारे प्रष्ट पारेको छ । विवाहित हुँदाको राम्रो पक्ष र अविवाहितहरूले जीवनसाथी हुँदाको परिकल्पना र हुने उत्सुकता गीतमा समेटिएको छ ।
निर्माणपक्षले यो गीतमा टिकटक प्रितस्पर्धा समेत घोषणा गरेको छ । प्रितस्पर्धा अगस्ट २० सम्म सहभागीले भागलिन पाउनेछन् ।
टिमका अनुसार सहभागीले भाग लिदाँ ह्यास्ट्याग नत्र भने जिन्दगी व्यर्थ छ मेन्सन गर्नु पर्नेछ । यसमा बेस्ट पफमेन्सले ३० हजार, मोस्ट क्रियटिभ भिडियोले २० हजार र मोस्ट लाइक भिडियोले १० हजार पाउनेछन् ।
सरोज पौडेलले निर्देशन गरेको चलचित्र ‘कोशेढुङ्गा’ भदौ १२ गते रिलिज हुँदै छ ।
‘पूर्ण बहादुरको सारंगी’का निर्देशक पौडेलले निर्देशन गरेको भएकाले ‘कोशेढुंगा’ चलचित्र प्रतिक्षित सिनेमा बनेको छ ।
नरदेवी फिल्मसको प्रस्तुति र सारंगी फिल्मस्को सहकार्य रहेको चलचित्र ‘कोशेढुंगा’मा अभिनेत्री सुरक्षा पन्त, आर्यन सिक्देल, ऋचा शर्मा, मन्जिल कुमार, नीति शाह, प्रवीण खतिवडा, सरोज खनाल, विशाल पहाडी, हिउवाला गौतम, दिनेश काफ्ले, लोकमणि सापकोटालगायतको अभिनय रहेको छ ।
‘कोशेढुंगा’को निर्मातामा प्रेविल कँडेल र किशोर अनुराग छन् । चलचित्रको कार्यकारी निर्माता दिनेश खड्का हुन् ।
बाबु श्रेष्ठको छायांकन रहेको यो चलचित्रमा नहकुल खड्काको सम्पादन, आशिष अविरल र रिदम कँडेलको संगीत छ । यस चलचित्रको कास्टिङ डिरेक्टर सुवलमणि सापकोटा हुन् ।
नेपालसहित ४२ भन्दा धेरै देशमा एकसाथ रिलिज हुने भएको छ ।
‘कोशेढुंगा’लाई प्याट्रिक सुवेदी र रमेश ढकालको सेभेन सिज इन्टरनेसनलले अन्तर्राष्ट्रिय बजारमा वितरण गर्दैछ । यो चलचित्र डायस्पोरामा नेपाली सिनेमाकै इतिहासमा पहिलो पटक एकसाथ ४२ देशमा प्रदर्शनमा आउने जनाएको छ ।
पहिलो पटक यति धेरै देशमा एकसाथ चलचित्र प्रदर्शन हुँदा ‘कोशेढुंगा’ले नेपाली सिनेमालाई अन्तर्राष्ट्रिय स्तरमा नयाँ उचाइ दिने अपेक्षा निर्माण टिमको छ ।