‘झरीपछिको इन्द्रेणी’ को अष्ट्रेलिया प्रदर्शन अधिकार बिक्री
काठमाडौं । चलचित्र ‘झरी पछिको इन्द्रेणी’ को अष्ट्रेलिया प्रदर्शन अधिकार (राइट्स) बिक्री भएको छ । कलाकार अर्जुन घिमिरे पाँडेको दिर्नेशनमा निर्माण भइरहेको यो चलचित्रको छायांकन पूरा नहुँदै विदेश प्रदर्शन अधिकार बिक्री भएको हो ।
हाल काठमाडौं आसपासमा छायांकन भइरहेको चलचित्रको अष्ट्रेलियामा रहेका नेपाली उद्यमी राम कार्कीले राइट्स खरिद गरेका हुन् ।
कार्की त्यहाँको नेपाली समुदायबीच परिचित नाम मानिन्छन् । शिक्षा तथा माइग्रेशन सेवामा सक्रिय रहेका उनले अष्ट्रेलियामा मोर्टगेज ब्रोकर फर्म, एकाउन्टिङ फर्म र विभिन्न हस्पिटालिटी व्यवसाय सञ्चालन गरिरहेका छन् । व्यवसायिक सफलता संगसंगै उनी नेपाली कला, संगीत, चलचित्र र खेलकुदप्रति पनि गहिरो रुचि राख्ने व्यक्तिका रूपमा चिनिन्छन् ।
राम कार्कीका अनुसार ‘झरी पछिको इन्द्रेणी’ नेपालसँगै अष्ट्रेलियाका प्रमुख सहरहरूमा पनि रिलिज गरिनेछ । उनले भने, “यो चलचित्र अष्ट्रेलियामा बस्ने नेपालीहरूका लागि मनोरञ्जनसँगै सन्देश दिने खालको हुनेछ भन्नेमा मलाई विश्वास छ ।”
पशुपति शिवजी इन्टरटेन्मेन्टको ब्यानरमा निर्माण भइरहेको यो चलचित्रमा दिपाश्री निरौला, निर्मल शर्मा, गणेश उप्रेती, रमेश उप्रेती लगायतका कलाकारको अभिनय रहनेछ । यहि चलचित्रबाट गणेशले करिव ९ बर्षपछि नेपाली चलचित्रमा कमब्याक गर्दैछन् ।
पारिवारिक कथावस्तुमा निर्माण हुने चलचित्र ‘झरी पछिको इन्द्रेणी’ मा कुमार व्यञ्जनकार (कुमार बेन) को कथा तथा अर्जुन घिमिरे र विशाल घिमिरेको पटकथा छ ।
सुशील कडरियाको लगानी रहेको चलचित्रलाई बुद्ध थापाले खिच्नेछन् । विशेषगरी काठमाडौं महानगरका प्रमुख बालेन शाहको र्याप गीत रहने चर्चाका कारण पनि यो चलचित्र निकै ठूलो अपेक्षा बनाएको छ ।