‘३६ को आँकडा’को शुभसाइतसँगै पहिलो झलक सार्वजनिक
काठमाडौं । सबिर श्रेष्ठको निर्देशनमा बन्ने नयाँ नेपाली चलचित्र ‘३६ को आँकडा’को शुभसाइतसँगै पहिलो झलक (फस्टलुक पोस्टर) सार्वजनिक गरिएको छ ।
अभिनेत्री रेखा थापाको होम प्रोडक्सनमा निर्माण हुन लागेको यो सिनेमाको शनिबार श्रीकृष्ण जन्माष्टमीको दिन पारेर पशुपति मन्दिरमा शुभसाइत पूजा गरेसँगै फस्टलुक पोस्टर सार्वजनिक गरिएको हो ।
सार्वजनिक पोस्टरमा अभिनेत्री द्धय रेखा थापा र पूजा शर्मालाई मुख्य केन्द्रमा देखाइएको छ । जसमा प्रहरी अधिकारीको भूमिकामा रहेकी रेखाले पूजालाई हत्कडी लगाएर नियन्त्रणमा लिएको दृश्य पोस्टरमा देखिन्छ ।
सार्वजनिक पोस्टर हेर्दा अभिनेत्री रेखाको अनुहारमा संघर्षपश्चात् प्राप्त आत्मविश्वास झल्किएको छ भने पक्राउ परेकी अर्की अभिनेत्री पूजाको अनुहारमा अझै हार नस्वीकार्ने चुनौतीपूर्ण भाव अभिव्यक्त छ ।
‘३६ को आँकडा’मा दुई महिला पात्रबीचको द्वन्द्वलाई कथाको केन्द्रमा राखिएको बुझ्न सकिन्छ । अलग-अलग छवि बनाएका रेखा र पूजाबीचको पर्दाको टक्कर, फरक कथा र प्रस्तुति दर्शककालागि रोचक हुने अनुमान गर्न सकिन्छ ।
यस सिनेमामा रेखाको जोडीका रूपमा पछिल्ला दिनमा अभिनयमा चर्चित अभिनेता महेश त्रिपाठी देखिनेछन् भने पूजासँग अभिनेता पुष्प खड्का फिचर हुनेछन् । निर्माणपक्षले पोस्टरमार्फत अन्य कलाकार र प्राविधिक टिमबारे जानकारी सार्वजनिक गरेको छैन । सुटिङ सुरु भएपछि ती विवरण सार्वजनिक गर्ने बताइएको छ ।
रेखा फिल्मस् र काइट्स इन्टरटेन्मेन्टको ब्यानरमा बन्ने यो चलचित्र आगामी सोमबारबाट छायांकनमा जाने तयारीमा निर्माण पक्ष रहेको छ ।
निर्देशक श्रेष्ठ र अभिनेत्री रेखाले यसअघि ‘रामप्यारी’, ‘तथास्तु’, ‘काली’, ‘इशारा’, ‘कसले चोर्यो मेरो मन’ जस्ता चलचित्रमा सहकार्य गरेका छन् । रेखा र पूजाले चलचित्र ‘उपहार’पछि पुनः सहकार्य गर्न लागेका हुन् ।
अभिनेता पुष्प खड्का २०२३ मा रिलिज भएको चलचित्र ‘मनसँग मन’को २ वर्षपछि पर्दामा देखिँदै छन् । यसमा पहिलो पटक पुष्प र पूजा जोडी भएर एकसाथ देखिन लागेका हुन् ।