‘बलिदान’को टिजरलाई उत्साहजनक प्रतिक्रिया, २४ घण्टामै १ मिलियन भ्युज
काठमाडौं । सन्तोष सेनको निदर्शेनमा निर्माण भएको चलचित्र ‘बलिदान’ को टिजरले युट्युबमा सार्वजनिक भएसँगै सामाजिक सञ्जाल र युट्युबमा दर्शकहरूको उत्साहजनक प्रतिक्रिया पाइरहेको छ ।
सार्वजनिक भएको २४ घण्टाभित्र नै टिजरले १ मिलियनभन्दा बढी भ्युज हासिल गर्दै नेपाली चलचित्र इतिहासमै छोटो समयमा यति ठूलो डिजिटल सफलता पाउने थोरै टिजरमध्ये आफूलाई उभ्याएको छ ।
सामान्यतया चलचित्रका गीत वा ट्रेलरभन्दा टिजरले यति धेरै प्रतिक्रिया पाउने परिपाटी कमै हुने गरे पनि ‘बलिदान’ टिजरलाई प्राप्त गरेको परिणामलाई उत्कृष्ट उपलब्धि मानिएको छ ।
चलचित्रका प्रमुख कलाकार समीर भट्टको स्टारडम र निर्देशक सन्तोष सेनको सिनेमाटिक प्रस्तुतिलाई यस सफलताको मुख्य कारणका रूपमा लिइएको छ । देशभक्ति, विद्रोह र क्रोध मिसिएको संवादसहितको टिजरले दर्शकलाई सशक्त र ऊर्जावान बनाएको प्रतिक्रिया आएको छ ।
टिजरमा समीर भट्टलाई ‘एक्सन किङ’को परिचय दिइँदै देखाइएको छ । उनको दमदार संवाद “यो आमा न लाचार छ, न त यो आमाको कोख नै खाली छ । यो आमाले छोरा मात्र होइन, योद्धा पनि जन्माएको छ” सामाजिक सञ्जालमा ट्रेन्डिङ बनेको छ । यस संवादले विशेषगरी युवापुस्तामाझ गर्व र उत्साह जगाएको प्रतिक्रिया व्यापक रूपमा आएको छ ।
त्यसैगरी, सौगात मल्ल, अर्पण थापा, ऋचा शर्मा, हेमन्त बुढाथोकीलगायतका कलाकारको अभिनयले टिजरलाई थप प्रभावशाली बनाएको छ ।
यसअघि समीर भट्टकै जन्मदिनका अवसरमा सार्वजनिक गरिएको प्रि-टिजर नेपाल मात्र होइन, विदेशी मुलुकमा समेत युट्युब ट्रेन्डिङमा आएको थियो । अहिले सार्वजनिक भएको आधिकारिक टिजरले त्यो उत्साहलाई अझै माथि पुर्याउँदै चलचित्रप्रति प्रतीक्षा चरम उत्कर्षमा पुगेको संकेत गरेको छ ।
‘बलिदान’ आसुसेन फिल्म्स प्रा.लि.को ब्यानरमा बनेको हो । यसका निर्माता पवन ब्राडफोर्ड बिस्ट र कार्यकारी निर्माता प्रेम पुरी रहेका छन् ।
यो चलचित्र आउँदो बडादसैँको फूलपातीका दिन देशभर प्रदर्शनमा आउने छ ।