‘प्रेमगीत ३’पछि हराएकी क्रिस्टिना अब व्यवसायमा
काठमाडौं । चलचित्र ‘प्रेमगीत ३’ बाट डेब्यू गरेकी नायिका क्रिस्टिना गुरुङलाई सुरुवाती दिनमै ठूलो चर्चा मिलेको थियो । चलचित्र रिलिजसँगै उनी नेपाली चलचित्र क्षेत्रमा स्थायी नायिकाको रुपमा स्थापित हुने अनुमान गरिएको थियो । तर, चर्चा र सफल डेब्यू सिनेमापछि पनि उनी तीन वर्षसम्म चलचित्र क्षेत्रमा सक्रिय देखिन सकिनन् ।
‘प्रेमगीत ३’ मा अभिनेता प्रदीप खड्कासँग जोडी बनेर देखिएकी क्रिस्टिनाले अमेरिकाबाट नेपाल आएर अभिनय यात्रा सुरु गरेकी थिइन् । यो सिनेमा नेपालमै मात्र नभई भारतमा हिन्दी संस्करणसहित विश्वका धेरै देशमा रिलिज भएको थियो । यसले क्रिस्टिनालाई नेपाली मात्र होइन, नेपाली डायस्पोरामाझ पनि चिनाएको थियो ।
तर, विसं २०७९ को दसैंमा ‘प्रेमगीत ३’ रिलिज भएयता उनी पर्दामा देखिएकी छैनन् । चर्चा चुलिएको बेला उनलाई विभिन्न चलचित्रबाट अफर आएको भन्ने हल्ला चले पनि उनले कुनै सिनेमा साइन गरेको समाचार बाहिरिएन । न त उनी मिडियामै सक्रिय भइन् । यही कारण चलचित्रकर्मी, सञ्चारकर्मी र दर्शकमाझ उनको गायबबारे अनेक जिज्ञासा उठेका थिए ।
अब भने क्रिस्टिनाले नयाँ यात्रा सुरु गरेकी छन् । उनले ‘अमोरा नेपाल’ नामक बुटिक व्यवसायमा हात हालेकी छन् ।
व्यवसायमा हात हालेकी क्रिस्टिनाले यो यात्रालाई आफ्नो जीवनको अर्थपूर्ण कुराको सुरूवात भनेकी छन् । महाराजगञ्जस्थित नारायणगोपाल चोकमा कृष्ण जन्माष्टमीको दिनबाट सुरु भएको उक्त पसलमा महिलाका लागि विभिन्न डिजाइन र रंगका कुर्थादेखि साडीसमेत उपलब्ध छन् ।
सामाजिक सञ्जालमार्फत व्यवसाय सुरु गरेको जानकारी दिँदै क्रिस्टिनाले लेखेकी छिन्, “कृष्ण जन्माष्टमी मेरो जीवनमा सधैं विशेष रहँदै आएको छ । र, यस वर्ष यो अझ अर्थपूर्ण सुरुवातको दिन बनेको छ । सबैलाई स्वागत छ ।” उनको पोस्टमा प्रशंसक र शुभचिन्तकले बधाई र शुभकामना व्यक्त गरेका छन् ।
क्रिस्टिनाले चलचित्र क्षेत्रमै फर्कने योजना बनाएकी छिन् वा अब पूर्णरुपमा व्यवसायमै केन्द्रित हुने ? यसबारे उनले खुलेर केही भनेकी छैनन् ।