‘कर्मयोगी तुलसीप्रसाद भट्टराई स्मृतिग्रन्थ’ लोकार्पण
काठमाडाैं । स्व. तुलसीप्रसाद भट्टराईको स्मृतिमा लेखिएको पुस्तक ‘कर्मयोगी तुलसीप्रसाद भट्टराई स्मृतिग्रन्थ’ लोकार्पण गरिएको छ । शनिवार प्रज्ञा प्रतिष्ठान कमलादीमा तुलसी-गणेश भट्टराई स्मृति प्रतिष्ठानद्वारा आयोजित कार्यक्रममा पूर्व रक्षामन्त्री हरि उप्रेती, हरिवन नगरपालिकाका मेयर रमेश बुढाथोकी, स्व. भट्टराईकी धर्मपत्नी रत्नमञ्जरी भट्टराई, सर्लाहीका राजनीतिज्ञ तथा समाजसेवी विनोद खनाललगायतले संयुक्तरूपमा पुस्तक लोकार्पण गरे ।
वि.सं. १९९७ असार ४ मा ओखलढुंगामा जन्मिएका भट्टराईको २०८१ साउन १८ मा निधन भएको थियो । ओखलढुंगा र सर्लाहीमा समाज सुधारका कार्यमा योगदान पुर्याएका स्वर्गीय भट्टराईका स्मृतिमा उनका छोराहरू कुमार, अरुण र नरेशले तुलसी-गणेश भट्टराई स्मृति प्रतिष्ठान गठन गरी सामाजिक कार्य गरिरहेका छन् । स्वर्गीय तुलसीप्रसादका जेठा छोरा गणेशको २०७५ माघ १२ मा बारामा सवारी दुर्घटनामा निधन भएको थियो ।
स्मृतिग्रन्थमा तुलसीप्रसादका उक्त स्मृतिग्रन्थमा स्वर्गीय भटराईका १८ लेख र अन्य ४० लेखकका रचनाहरू समेटिएका छन् । ती रचनाले उनको सामाजिक योगदानलाई उजागर गर्ने उनका कान्छा छोरा एवं सञ्चारकर्मी नरेश भट्टराईले बताए ।
उनले भने, ‘पुस्तक पढेपछि अपरिचितका लागि पनि बा परिचित बन्नुहुन्छ । हाम्रो भट्टराई परिवारसँगै बासँग सामिप्यतामा रहनुभएकाले लेख्नुभएका लेखले अधिकांश विषय प्रस्ट्याएको छ । हामीले एउटा पुस्तकमार्फत बाले आफ्नो जीवनकालमा गर्नुभएको रचनालाई अभिलेखका रूपमा सङ्ग्रहित गरेका छौँ ।’
उनले उक्त पुस्तक दुई सय ९४ पृष्ठको रहेको जानकारी दिए । उक्त पुस्तक डा तुलसी भट्टराई र डा होमप्रसाद भट्टराईले सम्पादन गरेका हुन् । पुस्तक लोकार्पण समारोहमा हरिवन नगरपालिकाका प्रमुख रमेश बुढाथोकी, गीतकार दिनेश अधिकारी, पूर्वमहान्यायधिवक्ता बद्रिबहादुर कार्कीलगायत उपस्थित थिए ।