धीरज मगरविरुद्ध झण्डै १५ करोड क्षतिपूर्ति माग्दै चलचित्र निर्माता संघमा उजुरी
काठमाडौं । नेपाली चलचित्र क्षेत्रमा एउटा ठूलो विवाद सतहमा आएको छ, जसको केन्द्रमा छन् अभिनेता धिरज मगर । उनीमाथि चलचित्र ‘ऐरी’लाई धोका दिएको भन्दै निर्माण कम्पनी मल्टी म्याट प्रा.लि.ले झण्डै १५ करोड रुपैयाँ क्षतिपूर्तिको माग गरेको छ । यो नेपाली फिल्म उद्योगकै सबैभन्दा ठूलो क्षतिपूर्ति दाबीमध्ये एक हो ।
चलचित्र ‘ऐरी’को निर्माण टिम र धिरज मगरबीच गत वर्षको चैत्र १९ गते औपचारिक सम्झौता भएको थियो । सम्झौता अनुसार, धिरजले अग्रिम भुक्तानी समेत बुझेका थिए । तर, जब चलचित्रको छायांकन सुरु गर्ने बेला भयो, तब धिरजले समय नदिएको र निर्माण टिमलाई झुलाएको निर्माता पक्षको आरोप छ । निर्माता कम्पनी मल्टिमेट प्रालिका तर्फबाट कमलबहादुर आलेले दिएको उजुरी दिएका थिए ।
मल्टी म्याटका सञ्चालक समेत रहेका आलेले नेपाल चलचित्र निर्माता संघमा दिएको उजुरीमा धिरजको व्यवहारलाई “गैर-व्यावसायिक, गैर-जिम्मेवार र नियतपूर्वक गरिएको लापरवाही” भनिएको छ ।
उजुरीमा उल्लेख गरिएअनुसार अभिनेता धिरजले छायांकनका लागि समय दिने बाचा गरे पनि महिनौंसम्म निर्माण टिमलाई सुटिङ स्थलमा अलपत्र पारेका थिए । यसका कारण निर्माताको करोडौं रुपैयाँ डुबेको दाबी गरिएको छ । यही क्षतिको भर्पाईका लागि निर्माण कम्पनीले धिरजसँग १४ करोड ७९ लाख ५१ हजार ९ सय ५३ रुपैयाँ माग गरेको हो ।
निर्माता संघमा उजुरी दिनुअघि कानून व्यवसायीमार्फत धीरजलाई लिगल नोटिस पठाइएपनि उनी सम्पर्कमा नआएको समेत जनाइएको छ ।
अभिनेता धीरजलाई १० लाख पारिश्रमिकमध्ये ४ लाख रुपैयाँ अग्रिम उपलब्ध गराएपनि सुटिङमा नआएको निर्माताले उल्लेख गरेका छन् । धीरज छायांकनमा उपस्थित नहुँदा फिल्मलाई उक्त रकम बराबरको क्षति पुगेको उजुरीमा उल्लेख छ ।
उजुरीमा चलचित्र निर्माणको क्रममा गराएको खर्च रकम ३ करोड ३१ लाख ६४ हजार ७१२, फिल्म परियोजनामा पारेको क्षतिवापत् ११ करोड ४३ लाख ८७ हजार २४१ र साइनिङ अमाउन्ट ४ लाख गरी १४ करोड ७९ लाख ५१ हजार ९५३ रुपैयाँ फिर्ता गर्न माग गरिएको छ ।
यति ठूलो रकमको उजुरी परेपछि निर्माता संघले यसलाई कसरी समाधान गर्छ भन्ने विषय अहिले सबैको चासोको केन्द्रमा छ । यो विवाद सार्वजनिक भएतापनि हालसम्म नेपाल चलचित्र निर्माता संघले यस उजुरीको विषयमा के निर्णय गर्यो भन्नेबारे कुनै आधिकारिक जानकारी बाहिर आएको छैन ।
यस विषयमा २ भदौमा संघमा उजुरी परेको अध्यक्ष नवल खड्काले जानकारी दिए । साथै, उनले संघ बाँकी प्रक्रियामा जाने बताए ।
यता, प्रदीप खड्का, सोनम तोप्देन जस्ता चर्चित कलाकारहरू समेत रहेको यो चलचित्रको केही अंश ढोरपाटनमा छायांकन भइसकेको छ । अझै पनि करिब साढे दुई महिनाको छायांकन बाँकी रहेको बताइएको छ ।