‘कोशेढुंगा’ले किन च्यासलमा सेट लगाएको थियो ? २० भन्दा बढी विदेशी कलाकारको अभिनय
काठमाडौं । चलचित्र ‘कोशेढुंगा’ यो वर्षको प्रतिक्षित सिनेमा हो । रेकर्ड बे्रकिङ कलेक्सन गरेको ‘पूर्ण बहादुरको सारङ्गी’का निर्देशक सरोज पौडेलको निर्देशन रहेकाले पनि यो चलचित्र प्रतिक्षित बनेको छ ।
यो चलचित्रले मंहगो मूल्यमा सेट निर्माण गरेर सुटिङ गरेको छ । ललितपुरको च्यासलमा सेट निर्माण गरेर छायांकन सुरु भएको थियो । च्यासलमा निर्माण गरिएको सेट नेपाली भूमिको नभएर विदेशको थियो ।
सिनेमाको कथाले साउदी अरबको भूमिको केही कथा भन्दै छ । साउदीमा छायांकन गर्न जान नपाएपछि ‘कोशेढुंगा’ले नेपालमै सेट बनाएको हो । जेल, फाँसी, बहसका लागि अदालत आदिको सेट बनाएर सिनेमा छायांकन गरिएको सिनेमाका कार्यकारी निर्माता दिनेश खड्काले जानकारी दिए ।
“धेरै कलाकार र क्रू मेम्बरसहित साउदी जान भिसाका कारण कठिन भएपछि हामीले नेपालमै सेट लगाएर छायांकन गरेका हौँ,” उनले भने, “तर, हामीले हुबहु देखाउन कुनै कसर बाँकी राखेका छैनौँ ।” विदेशमा गएर कम्प्रमाइज गरेर खिच्दाभन्दा नेपालमै सेट लगाएर खिच्दा राम्रो देखिने भएपछि नेपालमै सेट लगाएको उनले स्पष्ट पारे ।
कथाअनुसार नै विदेशबाट विदेशी कलाकार झिकाएर अभिनय गराएको उनले जानकारी दिए । ‘कोशेढुंगा’मा २० भन्दा बढी कलाकार विदेशी कलाकार रहेको उनले बताए ।
सरोज पौडेलको निर्देशन रहेको चलचित्र ‘कोशेढुंगा’ भदौ १२ गते रिलिज हुँदै छ ।
‘पूर्ण बहादुरको सारङ्गी’का निर्देशक पौडेलको निर्देशन रहेको यो चलचित्र ‘कोशेढुंगा’को छायांकन स्याङ्जाको आधिखोला, त्रिवेणी र सिरुवारी क्षेत्रमा गरिएको छ ।
नरदेवी फिल्मसको प्रस्तुति रहेको चलचित्र ‘कोशेढुंगा’मा अभिनेत्री सुरक्षा पन्त, आर्यन सिक्देल, ऋचा शर्मा, नीति शाह, प्रवीण खतिवडा, सरोज खनाल, विशाल पहाडी, लोकमणि सापकोटा, हिउवाला गौतम, सिर्जना अधिकारी, शेखर चापागाई, दिनेश काफ्ले, सिरु विष्ट, स्नेहा जोशी, सुबलमणि सापकोटा, सविता रेग्मीलगायतको अभिनय रहेको छ । सिनेमाको लिडमा सुरक्षा पन्त छिन् ।
चलचित्रको निर्मातामा प्रेविल कँडेल र किशोर अनुराग छन् । कार्यकारी निर्माता दिनेश खड्का हुन् । बाबु श्रेष्ठले छायांकन गरिरहेको यो चलचित्रलाई सुरेन्द्र पौडेलले सम्पादन गरिरहेका छन् ।
यस चलचित्रको गीतमा रिदम कँडेल र आशिष अविरलको संगीत रहने छ । कास्टिङ डिरेक्टर सुवलमणि सापकोटा हुन् ।