भगवान् महादेवप्रति समर्पित भक्ति गीत ‘जय जय शङ्कर’ सार्वजनिक
काठमाडौं । गायक सुगम पोखरेलको स्वरमा भगवान् महादेवप्रति समर्पित नयाँ भक्ति गीत ‘जय जय शङ्कर’ सार्वजनिक भएको छ ।
राजधानीको नयाँबानेश्वरस्थित आईएनआई सिनेमाजमा आयोजित विशेष समारोहमार्फत गीतको लोकार्पण गरिएको हो । कार्यक्रममा नेपाली काँग्रेसका महामन्त्री गगनकुमार थापा र कर्णाली प्रदेशका पूर्व मुख्यमन्त्री तथा पूर्व पर्यटन मन्त्री जीवनबहादुर शाही प्रमुख आतिथिका रूपमा उपस्थित थिए ।
यो भक्ति गीत डिजिसेन्स नेपाल प्रा. लि.को निर्माणमा तयार भएको हो । गीतमा स्वर्गीय नातिकाजीको सङ्गीत रहेको छ भने मोहित मुनालले पुनः संयोजनका साथै नयाँ सङ्गीत संयोजन गरेका छन् । गीतलाई थप सशक्त बनाउन अतिरिक्त शब्द विजय अधिकारीले लेखेका छन् ।
यस गीतको भिडियो धार्मिक तथा सांस्कृतिक महत्व बोकेको हुम्ला जिल्लाको लिमी उपत्यकाको लाप्चामा खिचिएको हो । समुद्री सतहदेखि करिब ५१०० मिटरको उचाइमा अवस्थित यो स्थानबाट प्रत्यक्ष रूपमा कैलाश पर्वत र मानसरोवर ताल देखिन्छ । निर्माण टिमले संसारमै पहिलो पटक यति दुर्गम भूभागमा म्युजिक भिडियो खिचिएको दाबी गरेको छ ।
भिडियोमा कलाकार बद्रीप्रसाद तिवारीको एकल अभिनय रहेको छ भने निर्देशन विजय अधिकारीले गरेका छन् । किरण थापाले कोरियोग्राफी गरेका छन् । छायाङ्कन निर्देशनमा हरि हुमागाईँ, सम्पादनमा भरत रेग्मी तथा निर्माण नियन्त्रकका रूपमा दिपेन गौतम ‘माइकल’ रहेका छन् ।
कार्यक्रममा बोल्दै पूर्व मुख्यमन्त्री शाहीले भिडियोले कर्णालीको पर्यटन प्रवर्द्धनमा ऐतिहासिक योगदान गर्ने विश्वास व्यक्त गरे । उनले भने, “हाम्रा स्रोत–साधन अपार छन्, कानुनी संरचना बलियो बनाउन सके देशलाई पाल्न सक्ने सम्भावना कर्णालीमै छ । यस भिडियोले त्यो सन्देशलाई झकझक्याउनेछ ।”
महामन्त्री थापाले भने, “सुगम पोखरेलको शक्तिशाली स्वर र बद्री तिवारीको प्रभावशाली अभिनयले गीतलाई जीवन्त बनाएको छ । कर्णालीमा दुःख मात्र होइन, अनुपम सौन्दर्य पनि छ भन्ने सन्देश यस गीतमार्फत फैलिएको छ ।”
निर्देशक विजय अधिकारीले पुराणमा वर्णित रावणले कैलाश पर्वत पुगेर गरेको साधनाको प्रसङ्ग स्मरण गर्दै भने, “हामी पनि लाप्चा पुगेर कैलाश र मानसरोवर प्रत्यक्ष देख्यौँ र त्यही स्थानमै यो गीतलाई जीवन्त तुल्यायौँ ।”
निर्माण पक्षले यस म्युजिक भिडियोमार्फत नेपालमै बसेर कैलाश पर्वत र मानसरोवर प्रत्यक्ष देख्न सकिन्छ भन्ने सन्देश विश्वभर पुर्याउने विश्वास व्यक्त गरेको छ । भिडियो डिजिसेन्स नेपालको आधिकारिक युट्युब च्यानलमार्फत सार्वजनिक गरिएको छ ।