किरण नेपालीको डेब्यु निर्देशनमा ‘महादशा’ निर्माण हुने, प्रि–टिजर सार्वजनिक
काठमाडौंँ । निर्माता किरण नेपालीको डेब्यु निर्देशनमा नयाँ नेपाली चलचित्र ‘महादशा’ निर्माण हुने भएको छ ।
बुधबार राजधानीको जमलस्थित विश्वज्योती मलको राजा लाउन्जमा आयोजित विशेष कार्यक्रममा चलचित्रको नाम घोषणा गर्दै प्रि–टिजर सार्वजनिक गरिएको हो ।
लेकाली इन्टरटेन्मेन्टले निर्माण गर्ने यस चलचित्रको प्रि–टिजर बुढासुब्बा डिजिटलको आधिकारिक युट्युब च्यानलमार्फत सार्वजनिक गरिएको छ ।
निर्देशक नेपाली यसअघि दर्जनौँ सफल सिनेमामा निर्माताको रूपमा संलग्न भइसकेका छन् । तर, निर्देशनको जिम्मेवारी भने पहिलो पटक सम्हाल्दैछन् ।
प्रि–टिजरमा प्रमोद अग्रहरी, प्रेमा लामगाढे र हाकिम गुरुङलाई परम्परागत भेषभूषामा प्रस्तुत गरिएको छ । निर्माण पक्षका अनुसार बाँकी कलाकारबारे जानकारी छायांकनको क्रममा सार्वजनिक गरिनेछ ।
यस चलचित्रको कथा मनिष गौतमले लेखेका हुन् । यसमा राजे के. शाह, श्याम मगर र अमला देवी राईले लगानी गरेका छन् भने सुरज आचार्य कार्यकारी निर्माता रहेका छन् । प्रोडक्सन म्यानेजरमा अनिश अधिकारी र समर चौलागाई छन् ।
निर्माण टिमका अनुसार ‘महादशा’ले नेपाली समाजमा प्रचलित संस्कार, संस्कृति र अध्यात्मसँगै मानिसको जीवनमा ग्रह–नक्षत्र, कर्म र रहस्यमय घटनाक्रमले पार्ने प्रभावलाई कथा–वस्तुमा प्रस्तुत गर्नेछ ।
चलचित्रको प्रदर्शन मिति भने छायांकन पूरा भएपछि मात्र घोषणा गरिने जनाइएको छ ।