धीरज मगर र ‘ऐरी’ टिमबीचको विवाद अन्ततः मिलापमा टुंगियाे
काठमाडौं । अभिनेता धीरज मगर र चलचित्र ‘ऐरी’ का निर्माताबीच उत्पन्न विवाद अन्ततः समाधान भएको छ ।
बुधबार चलचित्र निर्माता संघमा भएको छलफलपछि दुवै पक्षबीच सहमति जुटेको हो ।
‘ऐरी’ को निर्माण कम्पनी मल्टी म्याट प्रा.लिले धीरजविरुद्ध १४ करोड ७९ लाख ५१ हजार ९ सय ५३ रुपैयाँ क्षतिपूर्ति माग्दै निर्माता संघमा उजुरी दर्ता गरेको थियो ।
कम्पनीका सञ्चालक कमलबहादुर आलेले बुझाएको उजुरीमा धीरजले सम्झौता अनुसार समय नदिई गैरव्यवसायिक र गैरजिम्मेवार व्यवहार प्रदर्शन गरेको दाबी गरिएको थियो ।
उजुरीमा उल्लेख भएअनुसार धीरजले फिल्मका लागि कागजी सम्झौता गरेर अग्रिम भुक्तानीसमेत लिएपछि १६ दिन मात्रै छायांकनमा उपस्थित भएका थिए । बाँकी २८ दिनको निर्धारित छायांकनमा सहभागी नभएको कारण फिल्म टिमलाई ठूलो आर्थिक र प्राविधिक क्षति पुगेको निर्माताको तर्फबाट दाबी गरिएको थियो । यही आधारमा कम्पनीले भदौ २ गते निर्माता संघमा औपचारिक उजुरी दर्ता गरेको हो ।
यद्यपि, बुधबार संघको रोहबरमा भएको छलफलपछि दुवै पक्षबीच विवाद टुंगिएको छ । निर्माता संघका अध्यक्ष नवल खड्काका अनुसार छलफलपछि धीरज मगरले आगामी छायांकनमा समय दिने सहमति गरेका छन् ।
सहमतिअनुसार चलचित्र ‘ऐरी’ को बाँकी छायांकन अक्टोबर ५ देखि नोभेम्बर १५ सम्म हुने तय भएको छ ।