‘हरिबहादुरको जुत्ता’को टिजरमा सुध्रिएको दाबी गर्दै हरिवंश, सस्पेन्स प्रकाश
काठमाडौं । चलचित्र ‘हरिबहादुरको जुत्ता’को टिजर सार्वजनिक भएको छ । कमेडी फ्लेबरको टिजरमा सुध्रिन चाहेको हरिबहादुरले पुरानै छविका कारण पाएको दुःख छ ।
ठग र चोरको छवि भएको हरिबहादुरले समाजको शंकाका कारण व्यहोरिरहेको दुःखलाई प्रष्टसँग देखाइएको छ । सुध्रिएँ भनेर ठग्दै हिँड्ने हरिबहादुरले झन् ठूलो अपराध हत्या गरेपछि प्रहरीले जेल चलान गरेको टिजरमा देखिएको छ । साच्चै सुध्रिएर पनि पुरानो छविले उसलाई सज्जन बन्न दिएन की ऊ सुध्रिएको बाहानामा झन् ठूलो ठगी धन्दा गर्दा फस्यो यो भने सस्पेन्स छ ।
ठग, चोर हुँदै कसरी कोही व्यक्ति हत्यासम्म पुग्छ भन्ने सिनेमाले कथा भन्ने संकेत टिजरले गरेको छ । सोसल ड्रामामा कमेडी मिसाएर कथा ‘हरिबहादुरको जुत्ता’ले भन्नेछ ।
टिजरमा हरिवंश आचार्य उनको चर्चित टेलिभिजन सिरियल ‘हरिबहादुर’को चरित्रमा देखिएका छन् ।
टिजरमा चलचित्रका अधिकांश मुख्य कलाकार अटाएका छन् । प्रकाश सपूतको भूमिका सस्पेन्स छ । छोरीको भूमिकामा स्वस्तिामा खड्का छिन् । प्रहरी अधिकृतको भूमिकामा प्रियंका कार्की छिन् ।
दीपेन्द्र के खनालको निर्देशन गरेको चलचित्र दसैँको फूलपातीमा रिलिज हुँदैछ ।
हरिवंश आचार्य मुख्य भूमिकामा रहेको चलचित्रमा हरिवंश, प्रकाश र स्वस्तमा र प्रियंकासँगै हरिहर शर्मा, दिव्य देव, किरण केसी, राजाराम पौडेल, दिनेश काफ्ले, कमलमणि नेपाललगायत कलाकारको अभिनय छ ।
सिनेमालाई सरोज ओली र मोहितवंश आचार्यले निर्माण गरेका छन् । कृष्णबहादुर थापाले खिचेको सिनेमालाई नकुल खड्काले सम्पादन गरेका छन् ।