‘कोशेढुंगा’ नेपाली चलचित्र उद्योगकै कोशेढुंगा बन्ने निर्देशक सरोजको दाबी
काठमाडौं । चलचित्र ‘कोशेढुंगा’ कस्तो बनेको छ, त्यो त रिलिज पछि नै थाहा होला । तर, निर्माणपक्षले दर्शकले मन पराउने सिनेमा बनेको बताइरहेको छ ।
निर्माता, निर्देशक र कलाकारले सिनेमा राम्रो बनेको छ भनेर भन्नु स्वभाविक नै हो । तर, निर्देशक सरोज पौडेल भन्छन्, “रिलिजअगाडि भएर हामीले दाबी गरेका मात्रै होइन, साँच्चै चलचित्र राम्रो बनेको छ ।”
नाम अनुसारको चलचित्र बनेको उनको दाबी छ । “हाम्रो चलचित्रको नाम ‘कोशेढुंगा’ छ । हाम्रो उद्देश्य नाम अनुसारकै चलचित्र बनाउने हो,” निर्देशक सरोज भन्छन्, “नामले जसरी ‘कोशेढुंगा’ भनेको छ, हाम्रो काम पनि यो सिनेमालाई ‘कोशेढुंगा’ बनाउनेगरी नै भइहेको छ ।”
‘कोशेढुंगा’लाई नेपाली चलचित्र उद्योगकै ‘कोशेढुंगा’ बनाउने हाम्रो लक्ष्य हो । यो चलचित्र नामले मात्रै होइन स्तरीयताका हिसाबले पनि ‘कोशेढुंगा’ नै बन्ने उनी बताउँछन् ।
“पूर्ण बहादुरको सारङ्गी कसरी नेपाली चलचित्र उद्योगकै कोशेढुंगा भयो । त्यस्तै यो चलचित्र पनि कोशेढुंगा हुनेछ,” निर्देशक सरोज भन्छन्, “पूर्ण बहादुरको सारङ्गी पनि रिलिज हुँदासम्म कसैले विश्वास गरेकै थिएन । ‘कोशेढुंगा’ पनि त्यस्तै सिनेमा हुनेछ ।”
विषय र प्रस्तुति दुवैका हिसाबले ‘कोशेढुंगा’ दर्शकको नजरमा पर्नेमा उनी ढुक्क छन् । आम नेपाली जनताले देखेको र भोगेको विषयमा चलचित्र बनेकाले दर्शकले मन पराउने उनी सुनाउँछन् ।
सरोज पौडेलको निर्देशन रहेको चलचित्र ‘कोशेढुंगा’ भदौ १२ गते रिलिज हुँदै छ ।
निर्देशक पौडेलको निर्देशन रहेको यो चलचित्र ‘कोशेढुंगा’को छायांकन स्याङ्जाको आधिखोला, त्रिवेणी र सिरुवारी क्षेत्रमा गरिएको छ । काठमाडौंमा पनि सेट लगाएर यो सिनेमाको छायांकन गरिएको छ ।
नरदेवी फिल्मसको प्रस्तुति रहेको चलचित्र ‘कोशेढुंगा’मा अभिनेत्री सुरक्षा पन्तसँगै प्रेविल कँडेल, आर्यन सिक्देल, ऋचा शर्मा, नीति शाह, प्रवीण खतिवडा, सरोज खनाल, विशाल पहाडी, लोकमणि सापकोटा, हिउवाला गौतम, सिर्जना अधिकारी, शेखर चापागाई, दिनेश काफ्ले, सिरु विष्ट, स्नेहा जोशी, सुबलमणि सापकोटा, सविता रेग्मीलगायतको अभिनय रहेको छ ।
चलचित्रको निर्मातामा प्रेविल कँडेल र किशोर अनुराग छन् । कार्यकारी निर्माता दिनेश खड्का हुन् । बाबु श्रेष्ठले छायांकन गरिरहेको यो चलचित्रलाई सुरेन्द्र पौडेलले सम्पादन गरिरहेका छन् ।
यस चलचित्रको गीतमा रिदम कँडेल र आशिष अविरलको संगीत रहने छ । कास्टिङ डिरेक्टर सुवलमणि सापकोटा हुन् ।