हातको दाग बारे भ्रामक प्रचार गरेपछि वर्षाको आक्रोश
काठमाडौं । अभिनेत्री बर्षा राउतले आफ्नो पछिल्लो चलचित्र ‘हर्ष’ को ट्रेलर सार्वजनिक कार्यक्रमपछि मिडियामा आएका समाचारहरूलाई लिएर असन्तुष्टि व्यक्त गरेकी छन् ।
विशेषगरी, उनको हातमा रहेको दागबारे मिडियाले भ्रामक प्रचार गरेको भन्दै उनले सामाजिक सञ्जालमार्फत दुःख पोखेकी हुन् ।
राउतले कार्यक्रम फिल्मको भए पनि व्यक्तिगत जीवन र बोल्न नचाहेका विषयले प्राथमिकता पाएकोमा आक्रोश व्यक्त गरेकी छिन् ।
उनले लेखेकी छन्, “आज बनेका धेरै हेडलाइनहरूले मेरो हातमा लागेको दागलाई उठाएर पूर्ण रूपमा भ्रामक तरिकाले प्रस्तुत गरेका छन् । मेरा १०–१५ वर्षअघिका तस्वीरहरू अझै पनि मेरो प्रोफाइलमै छन्, त्यहाँ त्यही बेलाका दागहरू स्पष्ट देख्न सकिन्छ ।”
उनले आफूलाई कहिलेकाहीँ मिडियामा बोल्न डर लाग्ने गरेको र यो डर अहंकार नभई सरल मनले बोलेको कुरा पनि कहिलेकाहीँ गलत अर्थमा लिई व्यक्तिगत जीवनमा जोडिने भएकाले रहेको स्पष्ट पारेकी छन् ।
“कार्यक्रम त चलचित्र ‘हर्ष’ को थियो, तर न चलचित्रले हेडलाइन पायो, न कतै त्यसको उल्लेख भयो । व्यक्तिगत र भ्रामक हेडलाइनहरू मात्र बन्न पुगे,” अघि थप लेखेकी छन् ।
यस्तो छ अभिनेत्री राउतको स्ट्याटस
हिजो मेरो फिल्म ‘हर्ष’ को ट्रेलर रिलिज कार्यक्रममा मैले केही व्यक्तिगत प्रश्नहरूको उत्तर नदिने निर्णय गरेँ । किनभने कहिलेकाहीँ मौन रहनु नै सबैभन्दा राम्रो उत्तर हुन्छ भन्ने लाग्छ। तर आज आएर मिडियामा मेरो नबोलेका कुराहरूलाई फरक अर्थमा प्रस्तुत गरिएको देख्दा मन दुख्यो । मैले एउटा कुरा भनेकी थिएँ, ‘मलाई कहिलेकाहीँ मिडियामा बोल्न डर लाग्छ ।’ त्यो डर अहंकार होइन, न त दूरी बनाउने इच्छा हो । त्यो डर त त्यसैले हो किनभने जतिसुकै सरल मनले बोलेको कुरा पनि कहिलेकाहीँ गलत अर्थमा लिएर व्यक्तिगत जीवनमा जोडिन्छ। त्यसैले म बोल्नुअघि सयपटक सोच्न थालेकी छु ।
कार्यक्रम त चलचित्र ‘हर्ष’ को थियो, तर न चलचित्रले हेडलाइन पायो, न कतै त्यसको उल्लेख भयो । व्यक्तिगत र भ्रामक हेडलाइनहरू मात्र बन्न पुगे । म सधैं विश्वास गर्छु,कलाकारको सबैभन्दा ठूलो पहिचान उसको काम, उसको मेहनत र उसको सिर्जनशीलता हो, व्यक्तिगत जीवनका अनुमान होइन । म मेरो परिवार, मेरो पेशा र मेरो दर्शकहरूप्रति गहिरो सम्मान राख्छु ।
आज बनेका धेरै हेडलाइनहरूले मेरो हातमा लागेको दागलाई उठाएर पूर्ण रूपमा भ्रामक तरिकाले प्रस्तुत गरेका छन् । मेरा १०–१५ वर्षअघिका तस्वीरहरू अझै पनि मेरो प्रोफाइलमै छन् , त्यहाँ त्यही बेलाका दागहरू स्पष्ट देख्न सकिन्छ ।
