चलचित्र ‘प्रतिवैरम’को छायांकन सम्पन्न
काठमाडौं । निर्देशक रोशन दासको निर्देशनमा निर्माण भएको चलचित्र ‘प्रतिवैरम’को सम्पूर्ण छायांकन सम्पन्न भएको छ । मधेस केन्द्रित सामाजिक र राजनीतिक विषयवस्तुमा आधारित यस चलचित्रको सम्पूर्ण छायांकन ४५ दिनमा पूरा गरिएको निर्माण पक्षले जानकारी दिएको छ ।
चलचित्रको पहिलो चरणको छायांकन १५ दिन सर्लाहीमा गरिएको थियो भने दोस्रो चरणको छायांकन ३० दिन सिराहामा सम्पन्न गरिएको हो ।
चलचित्रको छायांकन निर्देशक अफ फोटोग्राफी ज्याकले गरेका हुन् । छायांकन सफलतापूर्वक सम्पन्न भएको निर्माण टिमले जनाएको छ । हाल चलचित्र पोष्ट–प्रोडक्सनको कार्य सुरु भएको छ ।
चलचित्रमा सम्राट दास, वीरेन्द्र कुशवाहा, आलिशा बस्तोला, सुप्रज्ञा शर्मा, गीता श्री, अशिष डीके, प्रदीप ढकाल, नारायण बिके, बिके शाह, रामेश बुढाथोकीलगायत अन्य कलाकारहरूको दमदार अभिनय रहेको छ ।
चलचित्रमा सह–निर्देशकका रूपमा सन्तोष मल्ल, अग्नि सुवेदी,धिरज राउत, र श्रीजना भुजेलले काम गरेका छन् ।
रेज इन्टरटेनमेन्टले निर्माण गरेको चलचित्रका प्रोडक्सन म्यानेजर कमल सुनार रहेका छन् ।
निर्देशक दासका अनुसार मधेसका वास्तविक कथा, सौन्दर्य र समस्यालाई यथार्थ ढंगले प्रस्तुत गर्ने उद्देश्यले यो चलचित्र निर्माण गरिएको हो । चलचित्रमार्फत मधेसको वास्तविकता दर्शक सामु पुर्याउने योजना रहेको उनले बताए । चलचित्रको कथा निर्देशक दास स्वयंको रहेको छ । पटकथा युवराज भट्टराईले लेखेका हुन् । निर्माण पक्षका अनुसार चलचित्र २०८३ प्रदर्शनमा ल्याउने तयारी छ ।
