बोर्डद्वारा चलचित्र अध्ययन गर्ने विद्यार्थीलाई छात्रवृत्ति प्रदान
काठमाडौं । नेपाली चलचित्र शिक्षाको स्तर उकास्ने दीर्घकालीन दृष्टिसहित चलचित्र विकास बोर्डले २०८२ सालका लागि विभिन्न तहमा अध्ययनरत विद्यार्थीलाई छात्रवृत्ति वितरण गरेको छ ।
फिल्म–सम्बन्धी विषयमा अध्ययन, अनुसन्धान तथा अकादमिक प्रगतिको लागि नियमित रूपमा सञ्चालन गर्दै आएको यो कार्यक्रम बोर्डको शैक्षिक क्षेत्रप्रतिको प्रतिबद्धताको महत्वपूर्ण उदाहरणका रूपमा लिइएको छ ।
यस वर्ष माध्यमिक तह (२) मा चलचित्र विषय लिएका विद्यार्थीलाई वार्षिक रु १५,००० का दरले छात्रवृत्ति प्रदान गरिएको छ । विद्यालय तहमै फिल्म–सम्बन्धी अध्ययनलाई प्रोत्साहित गर्न बोर्डले विगत केही वर्षदेखि निरन्तर सहयोग गर्दै आएको छ, जसले युवाहरूलाई प्रारम्भिक उमेरमै चलचित्र शिक्षाप्रति आकर्षित गर्न मद्दत गरेको छ।
स्नातक तहमा चलचित्र–सम्बन्धी विषय लिएर अध्ययनरत विद्यार्थीलाई वार्षिक रु ५०,००० को छात्रवृत्ति प्रदान गरिएको छ। खुला, महिला र समावेशी (मधेसी, दलित, आदिवासी, जनजाति) समूह समेटिनेगरी वितरण गरिएको यो सहयोगले फिल्म शिक्षामा पहुँच विस्तार र विविध समुदायका प्रतिभालाई अघि बढाउने लक्ष्यलाई सुदृढ गरेको बोर्डले जनाएको छ । उच्च शिक्षामा आर्थिक कारणले पछि पर्न सक्ने विद्यार्थीका लागि यो कार्यक्रम ठूलो प्रोत्साहन बनेको छ।
स्नातकोत्तर तहमा चलचित्रसम्बन्धी अनुसन्धान गरिरहेका विद्यार्थीलाई रु २५,००० का दरले शोध अनुदान प्रदान गरिएको छ । चलचित्रका सामाजिक, सांस्कृतिक, सौन्दर्यशास्त्रीय तथा नीतिगत पक्षमा आधारित अनुसन्धानलाई प्रोत्साहन दिन यसले महत्वपूर्ण उत्प्रेरणा दिएको छ । अनुसन्धानमै आधारित नीतिगत सुधारका लागि आवश्यक सामग्री उत्पादनमा पनि बोर्डका यी कार्यक्रम प्रभावकारी मानिएका छन् ।
स्नातकोत्तर तहमै चलचित्र ऐन–नियम, नीतिगत अध्ययन तथा शोधपत्र लेखन गर्दै आएका विद्यार्थीलाई समेत रु २५,००० को छात्रवृत्ति दिइएको छ ।
