‘पुरानाको काला कर्तुतले मनोबल घट्यो, नयाँलाई उही बाटोमा हिँड्ने छुट छैन’ : गायिका राउत
काठमाडौं । प्रतिनिधि सभा तथा प्रदेश सभा निर्वाचनको मतपरिणाम सार्वजनिक हुने क्रमसँगै देशभर एउटा नयाँ तरङ्ग पैदा भएको छ ।
दशकौंदेखि राजनीतिमा वर्चस्व जमाएका पुराना शक्तिहरूलाई पछि पार्दै राष्ट्रिय स्वतन्त्र पार्टी (रास्वपा) ले ल्याइरहेको अनपेक्षित नतिजाले आम नागरिकमा उत्साह र चासो दुवै छ ।
परिवर्तनको पक्षसँगै राजनीति उभारका रुपमा रास्वपा देखिएकाले नेपाली चलचित्र र सांगीतिक क्षेत्रका व्यक्ति यस विषयमा खुलेर सामाजिक सञ्जालमार्फत आफ्ना धारणा राखिरहेका छन् ।
यसै सन्दर्भमा गायिका आस्था राउतले आफ्नो धारणा सार्वजनिक गर्दै नयाँ शक्तिहरूको उदयलाई आशाको किरणका रूपमा चित्रण गरेकी छिन् । उनले पुराना दलहरूको कार्यशैलीप्रति तिखो टिप्पणी गर्दै नयाँ आएकाहरूलाई सचेत समेत गराएकी छिन् ।
गायिका राउतले वर्षौंदेखि सत्ता सम्हाल्दै आएका दलहरूका कारण आम जनतामा चरम निराशा छाएको उल्लेख गरेकी छिन् । उनले सामाजिक सञ्जालमा लेखेकी छिन्, “हाम्रो मनोबल पुराना दलहरूले गरेको व्यवहार अनि काला कर्तुतहरूले गर्दा घटेको थियो ।”
उनको यो भनाइले पुराना दलहरूभित्र व्याप्त भ्रष्टाचार, कुशासन र शक्ति लुछाचुँडीप्रति सर्वसाधारणको कति गहिरो आक्रोश छ भन्ने कुरालाई प्रतिबिम्बित गर्छ । विगतमा पटक–पटक अवसर पाउँदा पनि जनताको जीवनस्तर सुधार गर्न नसकेको भन्दै उनले पुराना शक्तिहरूप्रति असन्तुष्टि पोखेकी छिन् ।
रास्वपा जस्ता नयाँ राजनीतिक शक्तिहरूको प्रारम्भिक जित र अग्रताले आफूमा नयाँ ऊर्जा थपिएको आस्थाको तर्क छ । “नयाँहरूले गर्दा मनोबल उच्च हुँदै छ,” उनले लेखेकी छिन् । तर, उनले यो उत्साहलाई केवल समर्थनमा मात्र सीमित राखेकी छैनन् । नयाँ आउनेहरू पनि पुरानै प्रवृत्तिमा लिप्त हुन सक्ने आशंका गर्दै उनले ‘खबरदारी’ लाई मुख्य एजेन्डा बनाएकी छिन् ।
उनले स्पष्ट शब्दमा भनेकी छिन्, “यिनीहरूलाई पनि खबरदारी गर्ने हो । नयाँलाई पुरानाको बाटोमा हिँड्ने छुट छैन ।”
निर्वाचनमा नागरिकले परिवर्तनको पक्षमा दिएको मत केवल एउटा कागजको खोस्टो मात्र नभएर ठूलो विश्वास र भरोसा भएको राउतको भनाइ छ । उनले निर्वाचित हुने नयाँ प्रतिनिधिहरूलाई सम्बोधन गर्दै भनेकी छिन्, “हाम्रो भोट (मत) अनि विश्वासको इज्जत राख्नु । देशको लाज राख्नु ।”
गायिका राउतको यो धारणाले अहिलेको बदलिँदो राजनीतिक परिवेशमा आम मतदाताको साझा मनोविज्ञानलाई प्रतिनिधित्व गर्छ । मतदाताहरूले यस पटक ‘परीक्षण’ भइसकेका पात्रहरूभन्दा ‘आशा’ लाग्दा पात्रहरूलाई रोजेका छन् ।
निर्वाचनको अन्तिम नतिजा आउन बाँकी रहँदा नयाँ शक्तिका रूपमा रास्वपाको उदयले नेपालको संसदीय राजनीतिमा कस्तो प्रभाव पार्छ र उनीहरूले जनताको विश्वास कति कायम राख्न सक्छन्, त्यो भने हेर्न बाँकी नै छ । तर, आस्था राउतले भनेझैँ, अबको बाटो सजिलो छैन र नागरिकको ‘खबरदारी’ निरन्तर जारी रहने निश्चित छ ।
