जब निर्देशक सुदर्शनले प्रकाशलाई ‘काल्का’ चरित्र सुनाए…

काठमाडौं । चलचित्र ‘साङ्लो’ पछि अभिनेता प्रकाश शाह यही भदौ २१ गते रिलिज हुने ‘रावायण’मा देखिन लागेका छन् । उनी तराई मूलका ‘काल्का’ नामक शक्तिशाली चरित्रमा प्रस्तुत भएका छन् ।

निर्देशक सुदर्शन थापा फरक शैलीको फिल्म बनाउन चाहन्थे भने प्रकाश पनि फरक चरित्रमा अभिनय गर्न चाहन्थे । जब सुदर्शनले प्रकाशलाई ‘काल्का’को चरित्र सुनाए, प्रकाश छक्क परे ।

‘रावायणको कथा सुनेपछि म ढुक्क भएँ कि यस फिल्मले मेरो फरक चरित्र निभाउने चाहना पूरा गर्छ,’ प्रकाशले भने । उनले ‘काल्का’लाई कालको पनि कालको रूपमा परिभाषित गरेका छन् ।

प्रकाशलाई सुरुवातमा प्रमोद अग्रहरिको ‘आलम’ चरित्रका लागि सोचिएको थियो, तर स्क्रिप्ट पढेपछि उनी ‘काल्का’मा लोभिए । उनले यो चरित्र शक्तिशाली र चुनौतीपूर्ण भएको बताए । प्रकाश, जो कैलालीको टीकापुरबाट हुन्, फिल्ममा वीरगञ्जको भोजपुरी देहाती चरित्र निभाएका छन् । यस भूमिकाको लागि उनले वीरगञ्जमा १० दिन बिताएका थिए र त्यहाँको भाषा, संस्कृति, र जीवनशैली बुझ्न प्रयास गरे ।

फिल्मको टिजर र ट्रेलरमा प्रकाशको लुक्स देखाइएको छ, जसको लागि उनले तीन महिना दाह्रीजुँगा र कपाल नकाट्ने निर्णय गरे । उनले आफूलाई यथासक्दो फोहोरी देखाउन प्रयास गरे, ताकी चरित्रको वास्तविकता झल्कियोस् । प्रकाशले स्थानीय मान्छेसँग घुलमिल गर्दै उनीहरूको बोलीचाली, हिँडाइ र जीवनशैलीको अध्ययन गरे ।

फिल्ममा प्रकाशले युवा र बढी उमेरको चरित्र निभाएका छन् । उनले दर्शकलाई दुई फरक अवस्थाहरूमा देखिने जानकारी दिएका छन्ए-क युवा अवस्थामा र अर्को बुढेसकालमा । चलचित्रमा उनले निकिता चण्डकसँग एक आइटम गीतमा पनि सहभागिता जनाएका छन् । उनले फिल्मको सुटिङका क्रममा आफ्नो लुक्स देखेर बच्चाहरू तर्सेको सम्झिँदै खुसी व्यक्त गरे ।

प्रकाशलाई ‘काल्का’ चरित्रबाट बाहिर निस्कन कठिन भएको बताउँदै उनले चलचित्रको सुटिङ सकेपछि पनि केही समय त्यस चरित्रको प्रभावमा रहेको उल्लेख गरे । उनले चलचित्रका लागि गरिएको मेहनतको अनुभव र तापक्रमको सामना गर्नु परेको कठिनाइका बारेमा पनि चर्चा गरे । ‘रावायण’मा उनको भूमिका र समर्पणले उनलाई अभिनेताको रूपमा थप स्थापित गर्नेमा उनी ढुक्क छन् ।