‘छ माया छपक्कै-२’को पहिलो झलक सार्वजनिक, दुई गर्भवती महिलाको बीचमा दीपक
काठमाडौं । चलचित्र ‘छ माया छपक्कै-२’को पहिलो झलक सार्वजनिक गरिएको छ । निर्माण टिमले शनिबार सार्वजनिक गरेको पोस्टरमा चलचित्रको कथावस्तुबारे केही रोचक संकेत देखिन्छन् ।
पोस्टरमा अभिनेता दीपकराज गिरीलाई बीचमा उभिएर बाँसुरी बजाइरहेको देखाइएको छ । उनको दायाँ र बायाँतर्फ भने अभिनेत्री केकी अधिकारी र सनिशा भट्टराई गर्भवती महिलाको भूमिकामा प्रस्तुत छन् । दुवै जनाले आफ्नो पेटमा हात राखेको देखिन्छ ।
यस पोस्टरले चलचित्रको पारिवारिक सम्बन्ध र त्यससँग जोडिने सामाजिक परिस्थितिको वरिपरि घुम्ने संकेत गरेको छ । यद्यपि, निर्माण पक्षले पोस्टरमार्फत कथाको विस्तृत विवरण भने सार्वजनिक गरेको छैन । दीपकराजको बीचमा रहेको उपस्थितिले दुई महिला पात्रसँग उनको सम्बन्ध कथाको महत्वपूर्ण पाटो हुनसक्ने अनुमान गर्न सकिन्छ ।
यो चलचित्र आमा सरस्वती मुभिज, रोहित अधिकारी फिल्मस् र आईएमईको प्रस्तुतिमा निर्माण भएको हो । अघिल्लो भाग ‘छ माया छपक्कै’मा दीपकराज गिरी र केकी अधिकारीको जोडी देखाइएको थियो । दोस्रो श्रृंखलामा पनि यो जोडीलाई निरन्तरता दिइएको छ भने यसपटक सनिशा भट्टराई पनि चलचित्रको मुख्य कलाकारका रूपमा जोडिएकी छन् ।
पोस्टरमा सनिशालाई गर्भवती महिलाको भूमिकामा प्रस्तुत गरिनुले उनको चरित्र चलचित्रको कथामा महत्वपूर्ण हुने संकेत गरेको छ ।
पोस्टर हेर्दा चलचित्रले व्यक्तिगत सम्बन्धसँगै परिवार र समाजका केही संवेदनशील विषयलाई हास्य तथा मनोरञ्जनको शैलीमा प्रस्तुत गर्न सक्ने देखिन्छ । ‘छ माया छपक्कै–२’ केवल पारिवारिक कथामा मात्र सीमित नरहने निर्माण पक्षको भनाइ छ ।
दीपकराज गिरी सामाजिक तथा राजनीतिक विषयलाई हास्य–व्यंग्यसँग जोडेर प्रस्तुत गर्ने चलचित्रका लागि परिचित छन् । त्यसैले पहिलो झलकमा देखिएको पारिवारिक तथा गर्भावस्थाको प्रसंगसँग चलचित्रले सामाजिक–राजनीतिक विषयलाई कसरी जोड्छ भन्ने विषय भने चलचित्र प्रदर्शनपछि मात्रै स्पष्ट हुनेछ ।
यस चलचित्रमा कार्म शाक्य, रिहान गिरी, रविन्द्र झालगायत कलाकारको पनि अभिनय छ । जितु नेपालको छोटो भूमिका रहने बताइएको छ ।
सामाजिक-राजनीतिक कथावस्तुमा निर्माण भएको चलचित्रको पटकथा दीपकराज गिरी र दीपेन्द्र लामाले लेखेका हुन् । चलचित्रलाई दीपेन्द्र लामाले निर्देशन गरेका छन् भने सुशन प्रजापतिले छायांकन गरेका छन् ।
यो चलचित्रको निर्माता रोहित अधिकारी हुन् भने कार्यकारी निर्मातामा निर्मल शर्मा र सुरज बम ठकुरी रहेका छन् ।
सन् २०१९ मा प्रदर्शन भएको ‘छ माया छपक्कै’ले व्यावसायिक सफलता हासिल गरेको थियो । सोही टिमले निर्माण गरेको दोस्रो शृंखलालाई पनि दर्शकमाझ प्रतीक्षाको चलचित्रका रूपमा हेरिएको छ ।
‘छ माया छपक्कै-२’ दशैंको अवसरमा फूलपाती अर्थात् असोज ३१ गतेदेखि प्रदर्शनमा आउनेछ ।
