सृष्ट्रि र नाजिरको ‘मिसिङः केटी हराएको सूचना’को पोस्टर सार्वजनिक
काठमाडौं । चलचित्र ‘मिसिङः केटी हराएको सूचना’को नयाँ पोस्टर सार्वजनिक भएको छ । ट्री सिटी पिक्चर्सको ब्यानरमा निर्माण भएको यो सिनेमाको निर्देशन ३२ वर्ष पुरानो डकु-ड्रामा ‘उजेली’का निर्देशक दीपेन्द्र गौचनले गरेका हुन् ।
सार्वजनिक पोस्टरमा चलचित्रको प्रमुख भूमिकामा रहेका नाजिर हुसेन र सृष्टि श्रेष्ठलाई रेलको लिकमा हात समातेर हिँडिरहेको देख्न सकिन्छ। सृष्टि कुर्ता-सुरुवाल र ह्याटमा सजिएकी छिन् भने नाजिर सर्ट र पेन्टमा देखिएका छन्।
आशिस सापकोटाले डिजाइन गरेको पोस्टरको पृष्ठभूमिमा सिनेमाका अर्का कलाकार दुरा सञ्जय गुप्ता रातो रंगको हिरो होण्डा मोटरसाइकलमा देखिन्छन्, जसले कालो चस्मा लगाएका छन् र काँधमा गाम्छा भिरेका छन् । सञ्जयलाई पान खाएको अवस्थामा देखाइएको छ भने पृष्ठभूमिमा जनकपुर-जयनगर रुटको रेल र पहाड तथा तराईको दृश्य समेटिएको छ ।
सिनेमाको यसअघि संवादरहित टिजर र ‘हेर्दै जाऊ’ बोलको गीत सार्वजनिक भइसकेको छ ।
चलचित्रमा नाजिर, सृष्टि र सञ्जयसँगै रामनारायण ठाकुर, मदन ठाकुर, रिना रिमाल, कौशल्या ठाकुर, ललितादेवी मिश्र, रुपेश मण्डल, सुदीप पटेल, अनिल कुर्मी, मनोज शाह, अर्जुन पोखरेल, र ओमप्रकाश कर्णको अभिनय रहेको छ । साथै, अमितेष शाहको विशेष भूमिका रहेको छ ।
दीपेन्द्रकै निर्माण, कथा र लेखन रहेको चलचित्रमा अमित पोखरेल र अमितेष शाहको सहायक लेखन, अमित पोखरेलको स्क्रिप्ट सुपरभिजन छ । सिनेमाको छायांकन अमर महर्जनले गरेका छन् र सम्पादन निमेष श्रेष्ठले गरेका छन्। संगीतमा दीपेन्द्र गौचन, प्रवेश मल्लिक, र करण थापा छन् भने गीतमा सितुसित बस्नेत, रोहित जोन क्षेत्री, नेहा प्रियदर्शनी, इन्दिरा जोशी, र करण परियारले स्वर दिएका छन्।
यो चलचित्रको वितरण एप्पल इन्टरटेनमेन्ट, एफडी कम्पनी, र रिच इन्टरटेनमेन्ट ले गर्ने छन्।
