सर्यो ‘फिरफिरे फिरिरी’
काठमाडौं । चलचित्र ‘फिरफिरे फिरिरी’ को प्रदर्शन मिति हेरफेर गरिएको छ ।
छठ पर्वको दिन पारेर यही कात्तिक २२ गतेबाट प्रदर्शनमा ल्याउने तयारी गरिएको सिनेमाको हाललाई स्थगित गर्दै झन्डै साढे २ महिना पछाडि प्रदर्शन मिति सरेको छ ।
बुधबार निर्माण कम्पनी विन्ध्यवासिनी क्रियसनले एक विज्ञप्ति जारी गर्दै प्राविधिक कारणले प्रदर्शन मिति हेरफेर गरिएको जनकारी दिएको छ ।
कार्तिक २२ गते (नोभेम्बर ७, २०२४) सार्वजनिक प्रदर्शनमा ल्याउने तयारी रहेको चलचित्रलाई प्राविधिक कारणले निर्धारित मितिमा प्रदर्शन गर्न असमर्थ रहेको ब्यहोरा निर्माण टिमले प्रेस विज्ञप्ति मार्फत गराएको छ । चलचित्रको नयाँ प्रदर्शन मिति २०८१ माघ ४ गतेलाई तय गरिएको छ ।
ट्रेलरदेखि गीतसम्म रिलिज भइसकेको चलचित्रको निर्माण टिमले प्राविधिक कारण देखाए पनि तिहारका दुई ठूला बलिउड सिनेमा ‘सिंघम अगेन’ र ‘भूल भुलैया ३’ले असर गर्न सक्ने देखिएपछि ‘फिरफिरे फिरिरी’लाई पूर्वघोषित मितिबाट पछाडि सारिएको बुझ्न सकिन्छ ।
नविन भट्टको निर्देशनमा तयार भएको यो चलचित्रबाट सन्दीप श्रेष्ठ र भावना उप्रेतीले डेब्यु गरेका छन् भने रविना केसी, पिटर प्रिन्स, मनोज कुमार अधिकारी, शंकर सेढाई, सूर्यमान लिम्बू, पुष्प अवस्थी लगायतको अभिनय छ ।
निर्देशक भट्ट र सन्दीप श्रेष्ठले चलचित्रको स्क्रिप्ट तयार पारेका हुन् ।
हरर कमेडी जनराको चलचित्रको निर्माता मनोज कुमार अधिकारी हुन् । उनी १५ वर्षपछि निर्माणमा फर्किएका हुन् । उनले यसअघि ‘नौ डाँडा पारी’ र ‘मंगलसूत्र’ चलचित्र निर्माण गरेका थिए ।
नितिश पुन सह-निर्माता रहेको चलचित्रमा जितु तामाङको छायांकन, केशवराज भट्टको कोरियोग्राफी, एलिस कार्कीको ब्याकग्राउन्ड म्यूजिक, प्रशान्त सिवाकोटीको संगीत तथा अनन्त घिमिरेको सम्पादन छ ।
