फागुन १४ मा चार चलचित्र: थपियो ‘आउट ल’, शाे पुग्छ ?
काठमाडौं । फागुन १४ मा चारवटा चलचित्र रिलिज हुने भएका छन् । यो मितिमा एकै दिन चारवटा चलचित्र आउने भएका छन् ।
यसअघि ‘मायावी’, ‘लाज शरणम्’ र ‘हेस्टेल–३’ यो मितिमा आउँने बताइएको थियो । अब यही दिन ‘आउट ल’ पनि रिलिज हुने भएपछि चारवटा चलचित्र एकै दिन भिड्ने भएका हुन् ।
आर्टखबरलाई प्राप्त सूचनाअनुसार ‘आउट ल’ले फागुन १४ मा आउने आज निर्णय गरेको हो ।
‘होस्टेल–३’ फागुन १६ मा आउने भनिए पनि दुई दिन अगाडि सरेर १४ मै आउने तयारीमा रहेको स्रोतले जनाएको छ ।
‘आउट ल’मा सुशील श्रेष्ठसँगै नरेश पौडेल, शिक्षा संग्रौला, सुमन भण्डारी, हेम गुरूङ, सोनी लागुन लगायतको अभिनय छ।
‘लाज शरणम्’मा सीताराम कट्टेल मुख्य भूमिकामा छन् भने सक्किगोनी’ का कलाकारहरू अर्जुन घिमिरे (पाँडे), सागर लम्साल (बले), हरिश निरौला कक्रोज, प्रियाना आचार्य (मुन्नी), बबिन राई (गल्फने बाजे), रामभजन कामत, कमलमणि नेपाल (खुपीका बाउ) लगायतको अभिनय रहेको छ । यस्तै, यो चलचित्रमा बिजय बाराल, मुकुन्द श्रेष्ठ, प्रशान्त ताम्राकार, महेश त्रिपाठी, अर्पण थापा, रेणु योगी, माला लिम्बूलगायतका कलाकारको पनि अभिनय रहेको छ ।
‘मायावी’मा पल शाह, दीपिका प्रसाईं, सुशील सिटौला, समिम खान, करिश्मा श्रेष्ठ, प्रशान्त ताम्राकार, लक्ष्मी गिरी, रवि डंगोल, राजाराम पौडेल, अंशु महर्जन, रमा प्रसाईं लगायतको अभिनय छ ।
‘होस्टेल’को तेस्रो श्रृंखलामा टिकटकमा चर्चित कन्टेन्ट क्रिएटर ‘कुल ब्वाय’ अर्थात् पारस बम, ‘भ्वाइस अफ नेपाल’को सिजन ४ का फाइनलिस्ट तथा भुटानी गायक रिहान गिरी, आशिष घिमिरे, पदम तामाङ, सिम्रन पन्त, हेना नगरकोटी, उमर खान, समा पराजुली, सन्तोष बानियाँको यसमा अभिनय छ । चलचित्रमा आर्यन सिग्देल ‘वार्डेन’ को भूमिकामा देखिनेछन्।
एकै दिन चारवटा चलचित्र आउँदा शो बाँडफाँटमा भने समस्या हुनेछ । निकै न्यून संख्यामा यी चलचित्रले शो पाउनेछन् । वर्ड अफ माउथ जसको राम्रो हुनेछ, उसैले दोस्रो दिनबाट शो बढाउनेछ ।
मल्टिप्लेक्सको संख्या थपिए पनि चारवटा चलचित्र एकै दिन रिलिज हुँदा शो अपुग हुन्छ ।
दुईवटा चलचित्र भने एकै दिन आउँदा पनि शो अपुग नहुने वितरकहरूले बताउँदै आएका छन् ।