दीपक–दीपाको समूहबाट केदार बाहिरिएका हुन् ?
काठमाडौं । केही समययता कलाकार केदार घिमिरे (माग्ने बुढा) ‘छक्का पञ्जा’बाहेकका चलचित्र धमाधम साइन गरिरहेका छन् ।
‘छक्का पञ्जा’ टिमसँग मात्रै काम गर्दै आएका केदार पछिल्लो समय यो भन्दा बाहिरको टिमसँग पनि काम गर्न लागेका हुन् । हाल उनी अनमोल केसीसँग चलचित्र ‘जेरी अन टप’ को छायांकनमा व्यस्त छन् ।
केदारले ‘कंगारु’ यसअघि नै साइन गरिसकेका छन् । चलचित्र ‘माइतीघर’मा पनि उनले काम गर्ने निश्चित भइसकेको छ ।
यस्तै, उनले ऋषि लामिछानेले निर्देशन गर्ने अनटाइटल सिनेमामा पनि काम गर्ने पक्का पक्की भएका छन् ।
एकपछि अर्को गर्दै केदारले भटाभट फिल्म साइन गरिरहेका छन् । यसले अब केदार अब दीपकराज गिरी र दीपाश्री निरौलाको टिमसँग मात्रै नरहने प्रष्ट पारेको छ ।
छक्का पञ्जा टिमका स्थायी सदस्यका रूपमा परिचित केदारले यसअघि महंगो पारिश्रमिकका प्रस्तावलाई अस्वीकार गर्दै दीपक-दीपा टिमसँग मात्र काम गर्दै आइरहेका थिए । तर, पछिल्लो समय उनले बाहिरका चलचित्र ‘भटाभट’ साइन गर्नुले अब ‘छक्का पञ्जा’को अर्को सिरिज नबन्ने संकेत पनि गरेको छ ।
यसरी केदारको गतिविधि हेर्दा कतिपयले उनी छक्का पञ्जा टीमसँग असन्तुष्ट रहेको अनुमान गरेका छन् । कतिपयले त केदार छक्का पञ्जा टीमबाट बाहिरिएका त होइनन् भन्ने आशंका समेत व्यक्त गरेका छन् । अर्कोतर्फ, केदारलाई टिमले स्वतन्त्र रुपमा बाहिर काम गर्न छाडेको हुनसक्ने आँकलन पनि भइरहेको छ । स्रोतका अनुसार दीपक पनि अब केही समय बाहिरका ब्यानरका चलचित्रमा काम गर्ने तयारीमा छन् ।
‘छक्का पञ्जा’ टिममा काम गर्दै आएका कलाकारले अरु ब्यानरमा काम गर्ने कि नगर्ने सल्लाहमा मात्रै गर्दै आएका छन् ।
यो टिमबाट केही वर्ष अगाडि नै जितु नेपाल बाहिरिसकेका छन् । अब केदार पनि बाहिरिएका हुन् कि भन्ने धेरैले अनुमान गरेका छन् ।
केदार घिमिरे र दीपक र दीपाले सहकार्य गरेको नयाँ चलचित्र आउँछ कि आउँदैन भन्ने विषयले अहिले नेपाली सिनेवृतमै चर्चा पाएको छ । अब दीपक र दीपाले बनाएको चलचित्रमा उनले काम गर्ने छन् वा छैनन्, त्यसले पनि यो समूहबाट उनी बाहिरिएका हुन् अथवा होइनन् भन्ने प्रष्ट हुनेछ ।