सोमबारदेखि ‘पूर्ण बहादुरको सारङ्गी’ प्रदर्शन नगर्ने निर्माताको घोषणा
काठमाडौं । नेपाली चलचित्र उद्योगमा चर्चा कमाउन सफल चलचित्र ‘पूर्ण बहादुरको सारङ्गी’ सोमबारदेखि देशभरका सिनेमा हलहरूमा प्रदर्शन नहुने भएको छ । सेभेन सिस सिनेमाले एक प्रेस विज्ञप्ति जारी गर्दै यो जानकारी दिएको हो ।
चलचित्र निर्माण टोलीले दर्शकहरूबाट प्राप्त माया र समर्थनका लागि आभार व्यक्त गर्दै चलचित्रको प्रदर्शन रोक्नुपरेकोमा दुःख व्यक्त गरेको छ । विज्ञप्तिमा भनिएको छ, “पछिल्लो समय केही सिनेमा हलहरूले चलचित्रलाई नजरअन्दाज गरेको व्यवहारका कारण यो निर्णय गर्न बाध्य भएका हौँ ।”
चलचित्र पूर्ण बहादुरको सारङ्गी नेपाली चलचित्र उद्योगमा नयाँ सफलता र रेकर्ड बनाउने क्रममा रहेको थियो । तर, केही चुनौतिहरू र अवरोधका कारण आगामी सोमबार मंसिर २४ गतेबाट प्रदर्शन बन्द गरिने सेभेन सिस सिनेमाले स्पष्ट पारेको छ ।
प्रदर्शन रोकिनु परेकोमा गहिरो क्षमायाचना गर्दै निर्माण टोलीले भविष्यमा दर्शकको अपेक्षालाई ध्यानमा राख्दै नयाँ सिनेमासहित पुनः हलमा फर्किने वाचा गरेको छ । विज्ञप्तिमा भनिएको छ, “हामीले आगामी प्रोजेक्टहरूमा दर्शकलाई उच्चस्तरीय मनोरञ्जन प्रदान गर्न अझै मेहनत गर्नेछौँ ।”
