‘पुष्पा २’को विश्वभर ४४९ करोड कमाइ : शाहरुखको ‘जवान’को रेकर्ड तोड्यो, भारतमा कति कमायो ?

काठमाडौं । चलचित्र ‘पुष्पा २ : द रुल’ले रिलिजको दुई दिनमा विश्वभर करिब ४४९ करोड भारु कमाएको छ । योसँगै भारतीय बक्स अफिसमा सिनेमाको कलेक्सन २६५ करोड भारु रहेको छ ।

इन्डस्ट्री ट्र्याकर सकनिल्कका अनुसार ‘पुष्पा २’ले हिन्दी संस्करणबाट करिब १३१ करोड कमाएको छ । यस हिसाबले चलचित्रले विश्वव्यापी कमाईको मामिलामा शाहरुख खानको जवान र एसएस राजामौलीको ‘आरआरआर’लाई पछाडि छोडेको छ ।

‘आरआरआर’ले दुई दिनमा विश्वभर ३७१.५३ करोड रुपैयाँ कमाएको थियो । चलचित्र ‘जवान’को कुरा गर्ने हो भने दुई दिनमा विश्वभर २३९.४७ करोड कमाइ गरको थियो ।

• 
• 
• 

‘पुष्पा २’ले शुक्रबार हिन्दी संस्करणमा मात्रै ५० करोडभन्दा बढी कमाएको छ । तर, यस मामिलामा यो सिनेमाले शाहरुखको ‘जवान’ र रणवीर कपूरको ‘एनिमल’लाई उछिन सकेन । चलचित्रले पहिलो दिन नै हिन्दी भर्जनमा ७२ करोड कमाएको थियो ।

बुधवार पेड प्रीमियर (तेलुगू)मा १०.६५ करोड भारु कमाएको ‘पुष्पा २ : द रुल’ले पहिलो दिन ५ डिसेम्बर विहिबार भारतमा १६४.२५ करोड ग्रस कमाइ गर्दा विश्व बजारबाट २७५.२० करोड ग्रस कमाइ गरेको छ । दोस्रो दिन ६ डिसेम्बर शुक्रबार भारतमा ९३.८ करोड गर्दा १४६.१० विश्वव्यापी ग्रस गरेको छ ।

हिन्दी बेल्टमा दोस्रो दिन सबैभन्दा धेरै कमाउने चलचित्रहरू

चलचित्र	सङ्कलन
पठान	६८ करोड भारु
एनिमल	५८.३७ करोड भारु
टाइगर ३	५८ करोड भारु
पुष्पा २	५६.९ करोड भारु
केजीएफ २	४६.७९ करोड भारु
जवान	४६.२३ करोड भारु

चलचित्र ‘पुष्पा २’ को ओपनिङ डे कलेक्सनको कुरा गर्दा विश्वभर २९४ करोड कमाएको थियो । जसमा भारतीय बक्स अफिसमा फिल्मको कलेक्सन १७५.१ करोड थियो । ‘पुष्पा २’ ले हिन्दी संस्करणमा ७२ करोड कमाएको थियो ।

भारतीय बक्स अफिसमा कलेक्शनको हिसाबले ‘पुष्प २’ ले एसएस राजामौलीको चलचित्र आरआरआरको रेकर्ड तोडेको थियो । आरआरआरले भारतीय बक्स अफिसमा १३३ करोडको ओपनिङ गरेको थियो ।

सुकुमार बान्द्रेडीले निर्देशन गरेको ‘पुष्पा २’ तमिल, तेलुगु, मलयालम, कन्नड र हिन्दी गरी ५ भाषामा रिलिज भएको छ । अभिनेता अल्लु अर्जुन र अभिनेत्री रश्मिका मन्दनाको मुख्य भूमिका रहेको ‘पुष्पा-२’को कथा पनि निर्देशक सुकुमार स्वयंले लेखेका छन् ।

चलचित्रमा अल्लु अर्जुन फेरि पुष्पराजको भूमिकामा देखिएका छन् । रश्मिका मन्डन्ना पनि श्रीवल्लीको अवतारमा देखिएकी छिन् । चलचित्रको कथा गजबको छ र क्लाइम्याक्स झनै शानदार छ । जसका कारण दर्शकले चलचित्रलाई निकै रुचाइरहेका छन् ।