रियालिटी शो ‘एक्टिङ स्टार’को जुरी सार्वजनिक
काठमाडौं । रियालिटी शो ‘एक्टिङ स्टार’को जुरी टिम सार्वजनिक गरिएको छ । कार्यक्रमको आयोजक संस्थाका अनुसार अभिनय क्षेत्रमा योगदान र अनुभवको आधारमा यी तीनलाई निर्णायक बनाइएको हो ।
केही महिना अघि डिजिटल अडिसनको आव्हान गरेर प्रतियोगी खोज्न सुरु गरिएको यस कार्यक्रमको जुरी टिममा अनुभवी कलाकारहरू निर शाह, अनुप बराल र ऋचा शर्माले शोको निर्णायक भूमिका निर्वाह गर्नेछन् ।
डिजिटल अडिसनको माध्यमबाट हालसम्म हजारभन्दा बढीले आफ्नो अभिनय भिडियो पठाइसकेका छन् । निर्माण कम्पनी महक मिडिया नेटवर्कले डिजिटल अडिसनबाट छनोट भएका प्रतियोगीहरूलाई उनीहरूकै गाउँठाउँमा गएर सहभागिताको प्रमाणपत्र प्रदान गरिने जानकारी दिएको छ ।
बाल कलाकारदेखि वृद्धसम्मको सहभागीता रहेको यस शोमा अभिनय कला प्रस्फुटन गर्ने उद्देश्य राखिएको छ । कार्यक्रमको निर्देशन विशाल भण्डारीले गर्नेछन् ।
‘एक्टिङ स्टार’ रियालिटी शो एपिवान टिभीमार्फत प्रसारण हुनेछ । अन्य गायन, नृत्य र कमेडी रियालिटी शोहरू जस्तै दर्शकले ‘एक्टिङ स्टार’लाई पनि रुचाउने अपेक्षा गरिएको छ ।
डिजिटल अधिकार ओएसआर डिजिटलले खरिद गरेको यो शोको विजेताले नगद पुरस्कारसहित फिचर फिल्ममा काम गर्ने अवसर पाउनेछन् ।
‘एक्टिङ स्टार’ले नेपाली टेलिभिजन रियालिटी शोमा अभिनय क्षेत्रमा नयाँ ऊर्जा र प्रतिभा ल्याउने विश्वास गरिएको छ ।