‘माया बराबर’मा लक्ष्मी र जीवनको प्रेम-भाव
काठमाडौं । भूषण खतिवडा र शान्तिश्री परियारको स्वरमा रहेको नयाँ गीत ‘माया बराबर’ सार्वजनिक भएको छ । फिन्जु पाख्रिनका प्रेमिल शब्द र भूषण खतिवडाकै सङ्गीत रहेको यो गीत प्रेमिल भावना झल्काउने प्रयासको रूपमा प्रस्तुत गरिएको छ ।
गीत ‘नेपमेलो’ नामक युट्युब च्यानलबाट सार्वजनिक गरिएको हो । गीतको भिडियोमा अभिनेत्री लक्ष्मी बर्देवा र जीवन भट्टराईको वास्तविक प्रेम यात्रालाई मनोरञ्जनात्मक ढंगले प्रस्तुत गरिएको छ ।
उत्सव दाहालको छायाङ्कन रहेको भिडियोमा लक्ष्मी र जीवनसँगै सागर दाहाल र विशाल पहारीले अभिनय गरेका छन् ।
विशेष कुरा, गीतको भिडियो निर्देशन लक्ष्मी बर्देवा र जीवन भट्टराई आफैंले गरेका छन् । रियल जोडीको उपस्थितिले भिडियोमा थप रोचकता र यथार्थपरकता थपिएको छ ।
गीत र भिडियोले प्रेमको महत्वलाई सरल र आकर्षक रूपमा दर्शाउने प्रयास गरेको छ । ‘माया बराबर’ले दर्शक तथा श्रोताको मन जित्ने अपेक्षा निर्माण पक्षले गरेको छ ।