‘होस्टेल ३’ को छायांकन कार्य सम्पन्न
काठमाडौं । चलचित्र ‘होस्टेल ३’ को प्रमुख छायांकन कार्य सम्पन्न भएको छ । दुई चरणमा गरी ४९ दिनमा शुक्रबार सिनेमाको छायांकन पूरा भएको निर्माण पक्षले जानकारी दिएको हो ।
निर्देशक सशान कँडेलका अनुसार केही कलाकारहरूको शारीरिक परिवर्तन आवश्यक पर्ने भएकाले एक हप्ताको फुटकर छायांकन भने अझै बाँकी रहेको छ ।
‘होस्टेल ३’ नेपाली चलचित्र ‘होस्टेल’ शृङ्खलाको तेस्रो भाग हो । यस शृङ्खलालाई नयाँ प्रतिभा र अनुहारहरूको उदयस्थलका रूपमा लिइन्छ ।
यस चलचित्रमा पारस बम, रिहान गिरी, आशिष घिमिरे, पदम तामाङ, सिम्रन पन्त, हेना नगरकोटी, उमर खान, समा पराजुली, सन्तोष बानियाँ, रोहन श्रेष्ठ र आशिष पुरुषलगायतका कलाकारहरूले अभिनय गरेका छन् ।
‘होस्टेल’ शृङ्खलाबाट नेपाली चलचित्र उद्योगमा उदाएका कलाकारहरूमा अनमोल केसी, स्वस्तिमा खड्का, नजिर हुसेन, सलोन बस्नेत, सुशील श्रेष्ठलगायत पर्छन् ।
चलचित्रको स्क्रिप्ट माधव शर्माले लेखेका हुन् भने कथा निर्देशक सशान कँडेलकै हो । चलचित्र सम्मान इन्टरटेन्मेन्टले आरोन कन फिल्म्ससँगको सहकार्यमा निर्माण गरेको हो । प्राविधिक टिममा अर्जुन तिवारी डिओपी, बुद्ध थापा र मनोज खत्री सिनेमाटोग्राफर, सुदिप कुँवर मुख्य सहायक निर्देशक, यम प्रसाद ओली प्रोडक्सन डिजाइनर, शङ्कर कोइराला कार्यकारी निर्माता, कर्ण कार्की र गोविन्द अधिकारी निर्माता तथा सुरेश कँडेल सह-निर्माता रहेका छन् ।
हाल चलचित्र पोस्ट-प्रोडक्सन चरणमा रहेको छ । यसअघि फागुन १६ गते रिलिज हुने घोषणा गरिए पनि सो मितिमा रिलिज सम्भव नभएपछि निर्माण टिमले नयाँ रिलिज मिति चाँडै सार्वजनिक गरिने जानकारी दिएको छ ।