यस्तो छ ‘एक्लो’मा कविता र जेमीको लुक्स
काठमाडौं । प्रदीप शाहीको निर्देशनमा बनेको साइन्स फिक्सन चलचित्र ‘एक्लो-१’ (च्यापटर एक) को क्यारेक्टर पोस्टर सार्वजनिक गरिएको छ ।
निर्माण टिमले हलिउड कलाकार जेमी बेकन र मोडल कविता नेपालीको पोस्टर सार्वजनिक गर्दै चलचित्रको स्तरीयता झल्काउने प्रयास गरेको छ ।
लामो समयदेखि बेलायतमा बस्दै आएका निर्देशक शाहीको यो तेस्रो निर्देशकीय सिनेमा हो । हाल लण्डनमा पोस्ट प्रोडक्सन कार्य भइरहेको चलचित्रलाई शाहीले हलिउड स्तरको सिनेमा बनाउने लक्ष्य राखेका छन् ।
चलचित्रमा प्रदीप खड्का, विजय लामा, सुनील थापा, दिया पुन, वेनिशा हमाल, दिनेश डीसी, सुरज सिंह ठकुरी, त्रिचु राई, कविता नेपाली, कृष्णभक्त महर्जन, विकास अधिकारी, दिग्गज खत्री, श्रीशेष श्रेष्ठ र बाल कलाकार जेमिन श्रेष्ठ र स्योन सविक सिंहलगायतका कलाकार रहेका छन् ।
हलिउड अभिनेता जेमीको विशेष भूमिका रहेको छ ।
‘एक्लो’का निर्माता राजु कुमार गुरुङ, हरि श्रेष्ठ, विष्णु तामाङ, उत्सव विष्ट, भाइराजा थापा, नवीन सिवा र बागवीर पुन हुन् । कार्यकारी निर्माता विनोद सुवेदी क्षितिज रहेका छन् ।
चलचित्रको छायांकन बाबु श्रेष्ठले गरेका हुन् । द्वन्द्व निर्देशन राजु तामाङ, सेट डिजाइन राजु पेन्टर, कला निर्देशन सन्तोष लामा र प्रोडक्सन डिजाइन प्रेम खड्काले गरेका छन् ।
निर्देशक शाहीको भनाइ अनुसार ‘एक्लो’ हलिउड शैलीको प्राविधिक र कलात्मक पक्षलाई ध्यानमा राखी निर्माण गरिएको र यस सिनेमाले नेपाली चलचित्र उद्योगलाई नयाँ उचाइमा पुर्याउने अपेक्षा गरिएको छ ।
सिनेमाको सम्पूर्ण कार्य सकिएपछि मात्र प्रदर्शन मिति घोषणा गरिने निर्देशक शाहीले जानकारी दिए ।