‘कोशेढुंगा’मा सुरक्षा र आर्यनबाहेक को–को छन् ?
काठमाडौं । हिस्टोरिकल ब्लकबस्टर चलचित्र ‘पूर्ण बहादुरको सारङ्गी’ फेम्ड निर्देशक सरोज पौडेलले ‘कोशेढुंगा’ निर्माणको घोषणा गरेसँगै यसको लाइनअपलाई लिएर चर्चा भइरहेको छ ।
को–को कलाकार यो चलचित्रमा छन् भन्ने कुराको कौतुहल सिनेमा वृत्त र चलचित्रका शुवेच्छुकमा कौतुहल छ । जुन स्वभाविक पनि हो । तर, हालसम्म निर्माणपक्षले थिम पोस्टर सार्वजनिक गरे पनि कलाकार र प्राविधिकबारे जानकारी दिएको छैन ।
सरोजले चलचित्रको नाम घोषणा गरे पनि हालसम्म कलाकारको लाइनअप घोषणा गरेका छैनन् । तर स्रोतका अनुसार सुरक्षा पन्त र आर्यन सिक्देल फाइनल भइसकेका छन् । चलचित्र महिला चरित्र प्रधान रहेकाले सिनेमाको लिड रोलमा सुरक्षा पन्त हुने स्रोतको भनाइ छ ।
थिम पोस्टरले पनि ‘कोशेढुंगा’मा महिला चरित्रले सिनेमा लिड गर्ने प्रष्ट संकेत गरिसकेको छ । तर, को हो त्यो भने उनले खुलाएका छैनन् । स्रोतका अनुसार निर्माणपक्षले सुरक्षालाई साइन गराइसकेको छ । अन्य कलाकार को–को रहनेछन् जानकारीमा आएको छैन ।
सरोजले निर्देशन गरेको ‘पूर्ण बहादुरको सारङ्गी’ले नेपालमा मात्रै करिब ५० करोड ग्रसकलेक्सन गरिसकेको छ । ‘पूर्ण बहादुरको सारङ्गी’मा विजय बराल मुख्य भूमिकामा थिए ।
सरोजको ‘कोशेढुंगा’मा विजयले काम गर्ने छन् अथवा छैनन् भन्ने यतिबेला धेरैमा कौतुहल छ । तर स्रोतका अनुसार विजय ‘कोशेढुंगा’मा छैनन् । यो चलचित्रमा प्रकाश सपूत छन् कि छैनन् त्यसबारे पनि हालसम्म जानकारीमा आएको छैन । ‘पूर्ण बहादुरको सारङ्गी’मा विजय सँगै प्रकाश पनि थिए ।
निर्देशक पौडेलले आग्रह गरे पनि उनले ‘कोशेढुंगा’मा काम नगरेको स्रोतले जानकारी दिएको छ । विजय अरु चलचित्रमा व्यस्त भएकाले यो चलचित्रमा अनुबन्ध हुन नचाहेको बताइएको छ ।
‘कोशेढुंगा’ सोसल ड्रामा हो । अभाव, अग्लो सपना र संघर्षको कथा चलचित्रले भन्ने संकेत थिम पोस्टरले गरेको छ । यसबारे निर्माणपक्षले भने केही बोलेको छैन ।
निर्माण पक्षले जानकारी दिए अनुसार चलचित्र २०८२ मा रिलिज हुनेछ ।
नरदेवी फिल्मसको प्रस्तुति रहेको चलचित्रमा प्रेविल कँडेल र हरि महतको लगानी रहनेछ भने दिनेश खड्का कार्यकारी निर्माता रहेका छन् ।
बाबु श्रेष्ठको डीओपी रहने चलचित्र सुरेन्द्र पौडेलले सम्पादन गर्नेछन् । चलचित्रमा संगीत रिदम कँडेल र आषिश अविरलको रहनेछ ।
कास्टिङ डिरेक्टर सुवलमणि सापकोटा रहनेछन् । ‘पूर्ण बहादुरको सारङ्गी’का निर्देशकले निर्देशन गर्ने भएकाले ‘कोशेढुंगा’ चलचित्र प्रतिक्षित हुनेछ ।
