‘पुष्पा २’को नयाँ प्रदर्शन मिति सार्वजनिक
साउथका सुपरस्टार अभिनेता अल्लु अर्जुनको आगामी फिल्म ‘पुष्पा-द रुल’ को फ्यानहरू उत्सुकताका साथ पर्खिरहेका छन् ।
फिल्मको टिजर र गीत रिलिज भइसकेको छ तर ट्रेलर रिलिज हुनुअघि नै केही दिन अघिदेखि फिल्मको प्रदर्शन मिति परिवर्तन भएको समाचारहरु बाहिरीरहेका छन् ।
यस्तैमा फिल्म ‘पुष्पा २: द रुल’ को नयाँ रिलिज मिति सार्वजनिक भएको छ । अब यो फिल्म यस वर्षको अन्त्यमा अर्थात् ६ डिसेम्बर २०२४ मा प्रदर्शन हुने भएको छ ।
फिल्मको प्रदर्शन मिति सार्नुको मुख्य कारण पोष्ट प्रोडक्सनको केही काम बाँकी रहेको बताइएको छ । जसलाई पूरा गर्न टिमलाई थप एक महिना लाग्ने भएको छ ।
निर्माताले फिल्मको अघिल्लो भागको तुलनामा ‘पुष्पा: द रुल’ को स्तर बढाएका छन् । फिल्म बनाउन करिब पाँच सय करोड रुपैयाँ खर्च भएको र त्यसलाई उठाउन फिल्मले हरेक पक्षबाट उत्कृष्ट प्रदर्शन गर्नु आवश्यक देखिएको छ ।
निर्देशक सुकुमारको निर्देशन रहेको फिल्ममा अल्लु अर्जुन, रश्मिका मन्डन्ना, विजय सेतुपति र फरहादको महत्वपूर्ण भूमिका छ । फिल्मको पहिलो भागले ३७३ करोड कमाउन सफल भएको थियो ।
