यस्तो छ प्रदर्शनरत चलचित्र ‘एक्टर: टेक वन’को ‘जिन्दगी रेल’
काठमाडौं । शुक्रबारबाट प्रदर्शनमा आएको चलचित्र ‘एक्टर: टेक वन’ले उल्लेखनीय प्रतिक्रिया प्राप्त गरिरहेको निर्माणपक्षले दाबी गरेको छ ।
प्रदर्शनरत रहेको ‘एक्टर: टेक वन’को निर्माण पक्षले आईतवार नयाँ गीत सार्वजनिक भएको छ । आशुतोष उप्रेतीको आवाजमा रहेको ‘जिन्दगी रेल’ बोलको गीतका शब्दहरू किरण थापा मगर र आशुतोष उप्रेतीले लेखेका हुन् ।
गीतको सङ्गीत रोहित शाक्यले तयार पारेका छन् । किरण थापाले कोरियोग्राफी गरेका छन् । छायाङ्कन नरेन्द्र मैनालीले गरेका छन् भने, सम्पादन निमेश श्रेष्ठले गरेका छन् ।
गीतमा एक कलाकारको सपना र त्यसको लागि गरेको सङ्घर्ष पछि प्राप्त सफलतालाई दर्साइएको छ, जसमा अभिनेता प्रदिप खड्काको सफलता देखाइएको छ।
यस चलचित्रमा प्रदिप सहित आना शर्मा, दिव्या रायमाझी, राजबल्लभ कोइराला, दिव्य देव, सृजना अधिकारी, उषा रजक, सुशील सिटौलालगायतका कलाकारहरूको प्रमुख भूमिका रहेको छ । चलचित्रको स्क्रिप्ट आकाश बराल र राजन भुसालले लेखेका हुन् ।
अधृत फिल्म्स् र अ मोती फिल्मको संयुक्त प्रस्तुति रहेको यो चलचित्रमा निर्माता थमन कुमार भण्डारी, क्रियटिभ प्रोड्युसर मोती कार्की र सह-निर्माता अनीश भुसाल रहेका छन् ।
शुक्रबार साँझदेखि गति लिएको यो चलचित्र शनिबार बिहानैदेखि उत्कृष्ट प्रतिक्रियासँगै दर्शकको साथ पाइरहेको छ । चलचित्र हेरेपछि दर्शकले ‘एक्टर: टेक टु’ को माग गरेका छन् ।
