‘नेपाल फेस्टिभल–२०२५’ दिल्लीमा सम्पन्न
नयाँ दिल्ली । तीन दिवसीय ‘नेपाल फेस्टिभल–२०२५’ सम्पन्न भएको छ । नेपाल राजदूतावास, भारको सहयोगमा एभरेष्ट च्याम्बर अफ कमर्सको आयोजनामा नयाँ दिल्लीमा आयोजित ‘नेपाल फेस्टिभल–२०२५’ दिल्लीमा सम्पन्न भएको हो ।
दोस्रो दिनको पाचौँ सत्र भारत तथा नेपालका विशिष्ट ब्यक्तिहरूको उपस्थितिमा शनिबार साँझ ‘द सफ्ट पावर डाइनामिक इन इन्डिया–नेपाल टाइज : फ्रम सिनेम्याटिक भ्युपोइन्ट’ शीर्षकमा भएको छलफलसँगै फेस्टिभल सम्पन्न भएको थियो ।
कार्यक्रममा वक्ताको रूपमा एसियन एकेडेमी अफ फिल्म एन्ड टेलिभिजन (नोइडा, भारत)का अध्यक्ष सन्दीप मारवाह, फिल्म मेकर तथा फेसन आइकन डा. संजना जोन र फिल्म फेस्टिभल क्युरेटर तथा स्वतन्त्र लेखक सन्तानु गांगुलीले आफ्ना विचार राखेका थिए ।
नेपालबाट चलचित्र विकास बोर्डका अध्यक्ष दिनेश डीसी र कलाकार दीपकराज गिरी वक्ताको रूपमा सहभागी थिए ।
कार्यक्रममा चलचित्र विकास बोर्डसँग सहकार्य गरेर काम गर्न तयार रहेको वक्ताहरूले बताएका छन् । नेपालबाट भारतमा उक्त फिल्म सिटीमा चलचित्र पढ्न जाने विद्यार्थीको लागि छात्रवृद्धिको व्यवस्था गर्ने मौखिक सहमति भएको छ ।
कार्यक्रममा वक्ताहरूले दुई देशबीचको सांस्कृतिक सम्बन्धलाई अझ मजबुत बनाउने विश्वास व्यक्त गरेका थिए ।
बोर्ड अध्यक्ष डिसीले नेपाली चलचित्र छायांकनको सुन्दर स्थलहरूको जानकारी समेटिएको पुस्तक फिल्मिङ इन नेपाल समेत प्रदान गरेका थिए ।
