गीतमा जस्तै चलचित्रमा पनि भाइरल होलिन् कमला घिमिरे ?
काठमाडौं । कुनै समय भाइरल लोकदोहोरी बालगायिका गायिका कमला घिमिरे चलचित्रमा अनुबन्धित भएकी छन् । बाबू साहेब बलामीको कन्सेप्ट र निर्देशन रहने चलचित्रबाट गायिका कमलाले चलचित्रमा ‘डेब्यू’ गर्न लागेकी हुन् ।
रुना इन्टरटेन्ट्मेन्टको ब्यानरमा बन्ने फिल्म ‘माइली’ मा उनले अभिनय गर्नेछिन् ।
कमलाले आफूलाई संगीतमा झैं चलचित्रमा पनि दर्शकले माया दिने बताएकी छन् । “ गीत संगीतको क्षेत्रमा जस्तै दर्शकले मलाई फिल्ममा पनि माया र साथ दिनुहुनेछ,” उनले भनिन्, “आज मैले चलचित्रमा काम गर्ने अवसर पाएँ, म सम्झिन चाहान्छु मेरा ती सुरुवाती दिनहरु जतिखेर मलाई दर्शक स्रोताले धेरै माया गरेर आज यो ठाउँ सम्म पुर्याइदिनुभयो ।”
चलचित्र युनिटले कमलाको पोस्टरलुक पनि सार्वजनिक गरेको छ । सार्वजनिक पोस्टरलुकमा कमलालाई मन्द मुस्कानमा देखाइएको छ । उनको पृष्ठभूमिमा एक महिलाले केही काम गरिरहेको देख्न सकिन्छ ।
निर्देशक बलामीले सत्य घटनामा आधारित हुने भनिएको फिल्ममा महिलाको पीडा देखाइने बताएका छन् ।
असारको अन्तिमबाट छायांकन गरिने चलचित्र मकवानपुरको वीरखर्ग, कुलेखानी, काठमाडौं र दुवईमा खिचिनेछ ।
चलचित्रमा शंकर अधिकारी ‘घायल’को गीत र पटकथा, सम्बाद तथा राजेन्द्र बजगाइको संगीत रहनेछ ।