लगातार दुई चलचित्र हिटपछि प्रकाश सपुतलाई अफरको ओइरो
काठमाडौं । सांगीतिक क्षेत्रमा लोभलाग्दो चर्चा कमाएका गायक प्रकाश सपुतले चलचित्र ‘परदेशी २’ बाट अभिनेताका रुपमा डेब्यु गरे । गतवर्ष प्रदर्शनमा आएको चलचित्रले बक्स अफिसमा राम्रो व्यापार गर्यो । यसवर्ष तिहारमा उनको दोस्रो चलचित्र ‘पूर्णबहादुरको सारंगी’ रिलिज भयो । यो चलचित्रले सर्वाधिक व्यापारदेखि विभिन्न रेकर्ड कायम गर्यो ।
यो चलचित्र सफलताको जस अभिनेता विजय बरालले पाए पनि प्रकाश सपुतले लगातार दुईवटा चलचित्रबाट सफलताको स्वाद चाख्न पाए ।
लगातार दुई चलचित्र हिटपछि यतिबेला प्रकाश सपुतलाई चलचित्र अफरको ओइरो देखिएको छ । उनको आफ्नै निर्देशनमा बनिरहेको चलचित्र ‘वसन्त’ चैतमा प्रदर्शनमा आउँदैछ भने प्रकाशले एकपछि अर्को चलचित्र साइन गरिरहेका छन् ।
उनले केही साताअघि दीपेन्द्र के खनालको निर्देशनमा बन्ने ‘हरिबहादुरको जुत्ता’ साइन गरे । यो चलचित्रमा प्रकाशले वरिष्ठ अभिनेता हरिवंश आचार्यसँग काम गर्दैछन् । त्यस्तै, प्रकाशले अर्जुन सुवेदीको निर्देशनमा निर्माण हुने चलचित्र ‘सोल्टिनी’ पनि साइन गरेका छन् ।
रोहित अधिकारीको चलचित्र ‘माइतीघर’ पनि प्रकाशले साइन गरिसकेको बुझिएको छ । ‘पूर्णबहादुरको सारंगी २’ पनि २०८३ सालमा आउने चर्चा छ । यो चलचित्रमा पनि उनको अभिनय रहने बुझन् सकिन्छ । अन्य चलचित्रबाट पनि उनलाई अफर पुगिरहेको छ । यसरी हेर्दा प्रकाश सपुत अहिले निर्माताको रोजाइमा परिरहेका छन् ।