लोक–दोहोरी फोहोरी नहुन्, नेपाली गीतको मुहान सङ्लो राख
लोकगीत भन्नबित्तिकै लोकको गीत हो । लोक जीवन उजागर गर्ने गीत हो । माटोको सुगन्ध बोक्ने गीत हुन् । त्यसैले लोक गीतलाई विशेष मानिन्छ । समग्र गीतहरूको जननी लोकगीतलाई मानिन्छ ।
लोक गीत समग्र गीतहरूको मुहान हो । मुहान नै धमिलो भएपछि त्यहाँबाट बग्ने पानी पनि धमिलो हुन्छ । लोक तथा लोकदोहोरी गीतको कुरा गर्दा अहिले यस्तै भइरहेको छ ।
लोक तथा लोकदोहोरी गीतको मुहान नै फोहोर भएको छ । लोक र लोकदोहोरीका नाममा छाडा गीतहरू आइरहेका छन् । दोहोरी फोहोरी भएका छन् ।
छोटो समयमा पैसा र चर्चा कमाउँ भन्ने चाहना भएकाहरू यस्ता फोहोरी गीत लिएर युट्ष्युबमार्फत आइरहेका छन् । परिवार तथा आफन्तसँग बसेर सुन्न र भिडियो हेर्न नसकिने भएपछि अहिले सम्बन्धित संघसंस्थालाई समेत लाजमर्दो भएको छ ।
लोक तथा दोहोरी गीतसंगीतकर्मीहरूको संस्था लोक तथा दोहोरीगीत प्रतिष्ठान गृहमन्त्रालय पुगेर गृहमन्त्रीलाई भल्गर गीत ल्याउनेहरूलाई कारबाही गरिदिन माग गरे । उनीहरूले साइबर ब्युरो पुगेर उजुरी पनि दिए ।
एउटा गायक, गायिका तथा गीतकारविरुद्ध अर्को गायक, गायिका र गीतकारले लोकगीतलाई सभ्य र संस्कारी बनाइदेउ भनेर प्रहरीलाई गुहार्नुपर्यो । यो नेपाली लोकगीत संगीतको क्षेत्रका लागि राम्रो कुरा होइन ।
आधुनिक, र्याप, पप, चलचित्रका गीतभन्दा पनि नेपालको सन्दर्भमा लोकगीतको स्थान विशेष छ । किन भने लोक गीत भनेको नेपालको पहिचान हो । विदेशीका माझ नेपाली गीत कुन हो भनेर सुनाउनु पर्यो भने पक्कै पनि लोक र दोहोरी नै सुनाउनु पर्छ ।
तर अहिले यही लोक र दोहोरीमा नै विस्कृति देखिएपछि यसप्रति सम्बन्धित संस्था र राज्यले यसलाई रोक्न गम्भीरता देखाउनु सकारात्मक पक्ष हो । यसलाई रोक्न धमिलिएको मुहान पक्कै पनि सफा गर्नुपर्छ । यसलाई तत्काल रोक्न राज्य र सम्बन्धीत पक्ष अझै गम्भीर बनुन् । धमिलिएको पानी फेरि सङ्लो होस् । नेपाली गीतसंगीतको पहिचान सुरक्षित रहोस् ।