प्रकाश सपूतको करिअरकै फ्लप सिनेमा बन्यो ‘सोल्टिनी’
काठमाडौं । पछिल्लो समय सबभन्दा हिट फिल्म कुन अभिनेताले दिए ? धेरैलाई थाहा छ, अनमोल केसी । उसो भए पछिल्लो समय सबभन्दा कमजोर फिल्म दिने अभिनेता को हुन् ?
फिल्मको कथा, अभिनयका हिसाबले कमजोर भनिएको होइन फिल्मले गरेको न्यून व्यापारका हिसावले सबभन्दा कमजोर फिल्म कसले दिए ? जबाफ हो– प्रकाश सपूत ।
यसअघि लगातार सुपरहिट गीत दिएका, ‘परदेशी–२’ र ‘पूर्ण बहादुरको सारंगी’जस्ता सुपरहिट फिल्ममा अभिनय गरेका प्रकाश सपूतको फिल्म यसपालि भने नमज्जाले पछारियो ।
कात्तिक ६ गते रिलिज उनी अभिनीत सोल्टिनीले निराशाजनक व्यापार मात्रै गरेन, पछिल्लो समय अझ भनौं दसैंपछि जति पनि फिल्म रिलिज भएका छन्, तिमध्ये सबभन्दा थोरै व्यापार नै प्रकाश सपूतको फिल्मको छ ।
यो पछिल्लो समयमा सबभन्दा कम कमाउने फिल्म मात्रै होइन्, प्रकाश सपूतले अहिलेसम्म जति फिल्ममा अभिनय गरे, तिमध्ये सबभन्दा फ्लप फिल्म पनि सोल्टिनी बनेको छ । यो फिल्मले कुल ३० लाख रुपैयाँ पनि कमाउन सकेन ।
यो फिल्मले जम्मा २९ लाख ५ हजार ९५६ रुपैयाँ मात्र कमाइ गरेको छ । जम्मा यो फिल्मलाई ८ हजार ९४५ जना दर्शकले हेरेको चलचित्र विकास बोर्डको तथ्यांकमा छ ।
‘परदेशी–२’ र ‘पूर्ण बहादुर’को सारंगीलाई छाडेर हेर्ने हो भने पनि उनको आफ्नै फिल्म ‘वसन्त’ले पनि दुई करोड हाराहारी कमाएको थियो । दसैँ आएका उनी अभिनीत ‘हरिवहादुरको जुत्ता’ र ‘माइतीघर’को व्यापार पनि चार करोडमाथि पुगेको थियो । यसअर्थमा ‘सोल्टिनी’ प्रकाशको करिअरकै सबभन्दा फ्लप फिल्म बन्यो ।
