यस्तो छ चलचित्र ‘डोरी’ को नयाँ पोस्टर
काठमाडौं । चलचित्र ‘डोरी’ को नयाँ पोस्टर सार्वजनिक भएको छ ।
चैत्र १५ देखि देशभरका सिनेमा घरहरूमा प्रदर्शन हुने चलचित्रको पोस्टरले पात्र र कथावस्तुको झलक प्रस्तुत गर्दै दर्शकमा उत्सुकता बढाएको छ ।
पोस्टरमा प्रमुख कलाकारहरू प्रवीण खतिवडा, शिशिर बाङ्देल, प्रकाश घिमिरे, अरुण लामा, अञ्जना बराइली, राज पौडेल, कविता आले, नूतन र राज थापालाई प्रस्तुत गरिएको छ । पोस्टरको केन्द्रमा अभिनेत्री अञ्जना बराइलीलाई पारम्परिक पोसाकमा मुस्कानसहित देखाइएको छ, जसले चलचित्रको सांस्कृतिक पृष्ठभूमि झल्काउँछ ।
अन्य पात्रहरूको भावभङ्गीले कथावस्तुमा रहेको विविधता र गहन भावनाहरूलाई दर्साउँछ । पोस्टरमा विशेष गरी हास्यव्यङ्ग्य झल्काउने एक पात्र र आक्रोशित मुद्रामा देखिएको अर्को पात्रले कथाको रोचकता थप बलियो बनाएको छ ।
चलचित्रमा वीरेन्द्र सिंह कुशवाहाको विशेष अभिनय रहेको छ ।
‘डोरी’को लेखन तथा निर्देशन अरुण लामाले गरेका हुन् । यस सिनेमाका निर्माता दिनेश भट्टराई हुन् भने कार्यकारी निर्माताको रूपमा राज थापाले भूमिका निभाएका छन् ।
चलचित्रको स्क्रिप्ट डाक्टर मनोज पण्डित हुन् भने मुख्य सहायक निर्देशक दिनेश बहादुर रावत, एक्सन निर्देशक राजु तामाङ, सङ्गीत निर्देशक राजनराज सिवाकोटी, कला निर्देशक रोशन दिवाना, सम्पादक मिलन श्रेष्ठ, रङ्ग संयोजक रेनीश फागो छन् ।
