भिसा सिफारिस र अवार्डमा अमेरिकी चासो गम्भीर, सचेत होस् विकास बोर्ड
अमेरिकाले केही दिनअगाडि चलचित्र विकास बोर्डमै पुगेर चलचित्र अवार्डबारे चासो राख्यो । नेपालमा भइरहेका अवार्ड र विदेशमा हुने सिनेमा सम्बन्धी अवार्डबारे दूतावासले चासो राखेको थियो ।
अर्वाडमा मूल्यांकनको विधि र आधार के हो र यो कति विश्वस्नीय छ भनेर दूतावासले बोर्ड अध्यक्ष दिनेश डिसीसँग प्रश्न गरेको थियो । अमेरिकी दूतावासका नेपाल भिसा प्रमुख ग्रेगोरी डी. सिम्किसले चलचित्र कलाकारलाई भिसाका लागि के आधारमा बोर्डले सिफारिस गर्छ भन्दै बोर्ड अध्यक्ष डिसीसँग जिज्ञासा राखेका थिए ।
सिम्किसले अवार्डको विश्वस्नीयता र कलाकारहरूले प्राप्त गर्ने सिफारिश पत्रको आधिकारिकता माथि प्रश्न उठाउनु आफैँमा सामान्य विषय होइन । चलचित्र र गीतका अवार्ड अमेरिकामा बाक्लै हुने गरेका छन् । त्यसको अर्थ के हो र किन यति धेरै अवार्ड भइरहेका छन् भन्नेमा दूतावासको चासो छ ।
अमेरिकासहित अन्य देशमा हुने त्यस्ता अवार्ड कार्यक्रममा नेपाली कलाकार सहभागी हुन जाने गरेका छन् । उक्त कार्यक्रममा जानका लागि भिसाका लागि सिफारिस बोर्डले दिने गरेको छ ।
अमेरिका तथा युरोप जान भिसा सहजै पाउनका लागि सिनेमा र गीतका अवार्ड लिँदा सहज हुने गरेको भन्दै अवार्डको किनबेच हुने गरेको बेलाबेलामा समाचारहरू आउने गरेका छन् ।
भिसा लगाउन सजिलो हुन्छ भनेरे किनबेचकै लागि यस्ता अवार्ड हुने गरेको समाचार आउने गरेका छन् । यो सँगै अमेरिका गएका कतिपय कलाकार नफर्किने गरेको तथ्य पनि सबैसामु छर्लङ्ग नै छ ।
यसबाहेक विदेशम हुने कार्यक्रमका लागि भनेर गैरकलाकारले कलाकारको सिफारिस लिएर भिसा लिने गरेको र त्यस्ता अधिकांश व्यक्ति नफर्किने गरेको पनि समाचार आइरहेका छन् ।
त्यसैले यस्तो अवस्थामा नेपालस्थित अमेरिकी दूतावासले चासो देखाएको हो । यस्तो चासो देखाउनु स्वभाविक पनि हो । कार्यक्रममा भनेर जाने तर गएपछि गैरकानुनी रुपमा उतै बस्ने क्रम बाक्लिएपछि दूतावासले सचेत गराउन खोजेको हो ।
चलचित्र र संगीतका अवार्ड दिनकै हुने गरेका छन् । पछिल्लो समय नेपालमा मात्र होइन अमेरिका, अष्ट्रेलिया, क्यानडा, यूकेलगायत देशमा थुप्रै अवार्ड हुँदै आएका छन् । दर्शक नभए पनि खाली हलमा अवार्ड कार्यक्रम भएका तस्बिर र भिडियो आउने गरेका छन् ।
त्यसैले यसमा सम्बन्धित निकाय सचेत हुनुपर्ने देखिन्छ । तर, अझै पनि कलाकारका नाममा गैरकलाकार सिफारिस हुने र उतै लुक्नेक्रम रोक्नतर्फ सचेत नहुने हो भने कुनै दिन साँच्चै असली कलाकारले चाहिँ भिसा नपाउने दिन आउनसक्छ ।
समय नघर्किंदै बोर्ड, कलाकार संघलगायत संघसंस्था यस विषयमा गम्भीर भएर आवश्यक कदम नचाल्ने हो भने कुनै दिन कलाकारको परिचय देखाउँदा झनै भिसा नपाउने दिन आउनसक्छ ।
कलाकारको इज्जत जोगाउन पनि यस विषयमा सरोकारवाला पक्ष गम्भीर हुन आवश्यक छ । यसलाई सामान्य सम्झिएर बस्ने हो भने सच्चा कलाकार चाहिँ मारमा पर्ने निश्चित छ ।
