सुपरहिटको ह्याट्रिक पाएकी अञ्जनालाई ‘डोरी’ले अर्को हिटको स्वाद दिएला ?
काठमाडौं । तीनवटा सुपरहिट चलचित्र दिएकी अभिनेत्री हुन्, अञ्जना बराइली । लगातार तीनवटा सुपरहिट सिनेमा दिएर बक्सअफिसमा बलियो उपस्थिति जनाएकी छिन् । अञ्जनाले अब चौथो सुपरहिटको सिनेमाको सपना देखेकी छिन् ।
अञ्जनाको नयाँ चलचित्र ‘डोरी’ यही शुक्रबारबाट देशभर प्रदर्शनमा आउँदैछ । यसमा उनी प्रमुख भूमिकामा छिन् ।
पहिलो चलचित्र ‘महापुरुष’, दोस्रो चलचित्र ‘पुजार सार्की’ पछि ‘अल टाइम रेकर्ड ब्रेकर’ चलचित्र ‘पूर्ण बहादुरको सारङ्गी’गर्दै लगातार सुपरहिट सिनेमा दिएकी अञ्जनालाई ‘डोरी’ कुनै परीक्षा भन्दा कम देखिएको छैन । भलै उनका सुपरहिट सिनेमा आफैँमा महिलाचरित्र प्रधान सिनेमा थिएनन् । पुरुषपात्रले लिड गरेका चलचित्र थिए ।
लगातारको हिटले चर्चामा आएकी अञ्जनाका लागि अहिले फरक खालको चर्चा चलिरहेको छ । के ‘डोरी’ ले उनको हिट मेसिनको उपाधि जोगाउन सक्छ कि यो चलचित्रले उनको सफलताको श्रृङ्खला तोड्छ ?
‘डोरी’ रिलिज हुनुअगाडि नै फिल्मवृत भित्री गफ सुन्न पाइन्छ– यदि यो सिनेमाले राम्रो प्रदर्शन गरेन भने अञ्जनाको करियरमा ठूलै असर पर्नसक्छ ।
अञ्जना यो चलचित्रलाई लिएर निकै तनावमा छिन् । ‘डोरी’को प्रोमोशनमा उनको विशेष सक्रियता देखिएको छ, जसले सिनेमाप्रति उनको आशा झल्काउँछ । कतिपयले त यो चलचित्रलाई ‘अञ्जनाको करियरको टर्निङ प्वाइन्ट’ भन्दै शंका जनाएका छन् ।
चलचित्र ‘डोरी’लाई अरुण लामाले निर्देशन गरेका हुन् । यो सिनेमामा अञ्जनासँगै निर्देशक अरुण आफैँले पनि मुख्य भूमिका निभाएका छन् । तर, केही गसिप स्रोतका अनुसार सेटमा अञ्जना र अरुणबीच कहिलेकाहीं असमझदारी भएको खबर छ ।
“अरुणले निर्देशन मात्र हैन, अभिनय पनि गरेकाले उनी कहिलेकाहीं बढी नै पर्फेक्सनिस्ट बन्थे,” एक स्रोतले भन्यो, “अञ्जनालाई कहिलेकाहीँ अरुणको अभिनय शैली मन नपरेको सुनिन्छ ।”
तर, प्रोमोशनका क्रममा भने यी दुई एकदमै मिलेर देखिएका छन् । के यो प्रोफेशनलिजम मात्रै हो, कि पर्दा पछाडि केही फरक कहानी छ ?
यो चलचित्रले अञ्जनाका अघिल्ला सुपरहिट सिनेमाहरूले जस्तो जादू चलाउनेमा अझै अनिश्चितता छ । के अञ्जनाले सुपरहिट ह्याट्रिक कायम राख्नेछिन् ? कि ‘डोरी’ ले उनको सफलताको रफ्तार रोकिनेछ ? यसको उत्तर रिलिजको पहिलो दिन बाटै थाहा पाइनेछ ।
हरर, थ्रिलर, एक्सन र कमेडीको मिश्रण रहेको ‘डोरी’को कथा परिवारको आर्थिक बोझ हल्का गर्न जीवनका जोखिमपूर्ण निर्णयहरू लिने एउटा जीवनको गहिरो दुष्चक्रमा फसेको संघर्षशील युवाको वरिपरि घुमेको छ ।
जी सेवेन प्रोडक्सनको ब्यानरमा निर्माण भएको यस चलचित्रमा अञ्जना र निर्देशक अरुणसँगै प्रवीण खतिवडा, शिशिर बाङ्देल, प्रकाश घिमिरे, राज पौडेल, कविता आले, नूतन, राज थापा, वीरेन्द्र सिंह कुशवाहा, शारदा अधिकारी, प्रेम सुब्बा, सजन श्रेष्ठ, रामबाबु रेग्मी, लगायतका कलाकारहरूको अभिनय रहेको छ ।
चलचित्रको लेखन निर्देशक लामाले नै गरेका छन् भने मनोज पण्डितले ‘स्क्रिप्ट डक्टरिङ’ गरेका छन् ।
चलचित्रका निर्माता दिनेश भट्टराई हुन् भने कार्यकारी निर्माता राज थापा रहेका छन् । सिनेमामा सौरभ लामाको छायाकंन, दिनेश बहादुर रावतको मुख्य सहायक निर्देशक, राजु तामाङको एक्सन निर्देशक, राजनराज सिवाकोटीको सङ्गीत, मिलन श्रेष्ठको सम्पादन, रेनीश फागोको रङ्ग संयोजक रहेको छ ।
