नाजिरको दाबी– अब म रामेश्वर होइन ‘गुन्यु चोलो’को क्यारेक्टरबाट चिनिनेछु
काठमाडौं । एक दशक अगाडि रिलिज भएको चलचित्र ‘होस्टेल’बाट उदाएका नाजिर हुसेनले त्यसयता थुप्रै चलचित्रमा काम गरे । सयौँ म्युजिक भिडियोमा काम गरे ।
तर जतिसुकै चलचित्रमा काम गरे पनि नाजिर हुसेनलाई अहिले पनि धेरैले चिन्ने ‘होस्टेल’के रामेश्वर यादवको क्यारेक्टरबाट हो । त्यसयता उनले जति सुकै धेरै चलचित्रमा काम गरे पनि रामेश्वरको चरित्रलाई कुनै पनि क्यारेक्टरले रिप्लेस गर्न सकेका छैनन् ।
अब भने यो क्यारेक्टरलाई ‘गुन्यु चोलो : द ड्रेस’को चरित्रले पछि पार्ने नाजिरको विश्वास छ । भदौ १३ गते रिलिज हुने चलचित्रमा आफूले गरेको तेस्रोलिंगी महिलाको क्यारेक्टरले अब आफूलाई चिनाउनेमा उनी ढुक्क छन् ।
“१० वर्षसम्म मलाई रामेश्वर यादव भनेर होस्टेलबाट चिन्नुभयो । अब गुन्यु चोलोको तेस्रोलिंगीको क्यारेक्टरबाट चिन्नुहुनेछ,” नाजिरले भने, “कोभिड–१९ अगाडिदेखि नै गरेको अध्ययन र दुई वर्षदेखि गरेको मेहनतका कारण पनि अब रामेश्वर होइन यो सिनेमाको क्यारेक्टरबाट चिनिनेमा म ढुक्क छु ।”
‘गुन्यु चोला’को मुख्य भूमिकामा नाजिर हुसेन छन् । समुन्द्र भट्टको निर्देशन रहेको चलचित्र ‘गुन्यु चालो : द ड्रेस’ लैंगिक अल्पसंख्यक पारालैंगिक पात्रको कथामा बनेको छ ।
‘गुन्यु चोलो : द ड्रेस’मा नाजिर हुसेनको मुख्य भूमिका छ । उनले पारालैंगिक महिला (ट्रान्सवुमन)को भूमिका निर्वाह गरेका छन् ।
नाजिरका साथ सञ्चिता लुइँटेल, सुशील सिटौला, राजकुमार घोष, शिशिर राणा, अनुपम श्रेष्ठ र विशाल पहारीले पनि महत्वपूर्ण भूमिका निर्वाह गरेका छन् ।
नेपालको पहिलो पूर्णरूपको ट्रान्स स्टोरीमा निर्मित यो चलचित्रको अन्तर्राष्ट्रिय वितरण अधिकार अमेरिकाको बफेलो एट्लेले किनेको छ ।
चलचित्रको सम्पूर्ण पोस्ट प्रोडक्सनको काम बाहिर गरिएको छ । चलचित्रको एडिट, कलर, मिक्सिङ, साउन्ड डिजाइनदेखि ब्याकग्राउन्ड म्युजिकसम्मको काम हलिउड शैलीमा बाहिरै गरिएको छ ।
चलचित्रमा हलिउडकी कलाकार लिजा जेरार्डले स्वर दिएकी छिन् भने ब्याकग्राउन्ड म्युजिकको सम्पूर्ण काम मार्सेलो दी फ्रान्सिसीले गरेका छन् । हलिउड चलचित्र ‘ग्ल्याडिएटर– २’ मा लिजाले स्वर दिएकी थिइन् ।
यो चलचित्र नेपाली फिल्म प्रोडक्सन हाउस र हलिउड फिल्म प्रोड्क्सन हाउसको संयुक्त कोल्याबोरेसनमा बनेको हो । चलचित्रमा आकाश बुढाथोकी र भि–भन्से जानुबोनको लगानी छ । चलचित्रको कार्यकारी निर्माता जेफ्री जे वेन र स्टिभ जोन्स्टन हुन् भने अनुपम श्रेष्ठ चलचित्रका सहयोगी निर्माता हुन् ।
आलोक शुक्लाले खिचेको चलचित्रमा लेखु सहयात्रीको गीत रचना रहेको छ । यो चलचित्र अमेरिकाको प्रतिष्ठित तस्वीर फिल्म मार्केटमा छनोट भएको थियो ।