बक्सअफिस प्रणाली अनुगमन : ६० हलमध्ये २ ले गरे म्यानुअल टिकट बिक्री
काठमाडौं । चलचित्र विकास बोर्डले २०८२ साउन २९ गतेदेखि भदौ ४ गतेसम्म काठमाडौं उपत्यकासहित उपत्यकाबाहिरका विभिन्न जिल्लामा बक्सअफिस प्रणालीको अनुगमन गरेको छ ।
बोर्ड सदस्य गणेश सुबेदीसहित २२ जनाको टोलीले गोरखा, तनहुँ, कास्की, रुपन्देही, नवलपरासी, पाल्पालगायत जिल्लाका ६० वटा चलचित्र घर निरीक्षण गरेको बोर्डले जनाएको छ ।
अनुगमनका क्रममा अधिकांश हलले बक्सअफिस प्रणाली अनुसार टिकट बिक्री गरे पनि दुईवटाले सिंगल थिएटरमा ‘सिस्टम बिग्रिएको’ भन्दै म्यानुअल टिकट बिक्री भइरहेको फेला परेको बोर्डले जनाएको छ ।
बोर्डलाई जानकारी नदिई म्यानुअल टिकट बिक्री गरेकाले ती हललाई नियमानुसार जरिवाना गरिने बोर्डले जनाएको छ।
यसअघि २०८१ मंसिरमा १४ जिल्लामा गरिएको अनुगमनका क्रममा अवैधानिक रूपमा सञ्चालन भइरहेका ९ हल कारबाहीमा परेका थिए । तीनवटा हलमा जिल्ला प्रशासनको समन्वयमा ताल्चा लगाइएको थियो ।
बोर्डले नियमित अनुगमन गर्ने भन्दै चलचित्र घर नियमनमा रहने, शुल्क समयमै बुझाउने र बक्सअफिस प्रणालीको कार्यान्वयन प्रभावकारी हुने बताएको छ ।